Helga Vala Helgadóttir þingmaður Samfylkingarinnar og Willum Þór Þórsson heilbrigðisráðherra tókust á á Alþingi í dag umskýrslu ráðgjafarfyrirtækisins McKinsey um stöðuna á heilbrigðismálum á Íslandi.
Helga Vala spurði Willum um hvernig hann ætlaði að mæta mannaflaþörf heilbrigðiskerfisins með hækkandi aldri þjóðar en samkvæmt McKinsey mun eftirspurn eftir heilbrigðisþjónustu aukast um allt að 1,2% á ári vegna lýðfræðilegra breytinga.
Willum sagði skýrsluna sviðsmyndagreiningu en sagði ljóst að það þyrfti að bregðast við. Ráðgjafarfyrirtækið væri hins vegar með skýra lausn í skýrslunni sjálfri sem hann hvatti alla til að lesa.
„Við þurfum að auka verulega í og hefðum átt að byrja á því miklu fyrr en við erum þó farin af stað að auka heimahjúkrun, að auka stuðning við fólk heim og fara hætta sjúkdómsvæða eldra fólk. Við eigum að hjálpa fólki að lifa virku lífi lengur á ævinni eins og vilji er til og hætti að marka þetta við einhvern aldur,“ sagði Willum. Hann sagði þetta vera vel framsett í skýrslunni og hvatti alla til að kynna sér þessa „frábæru skýrslu.“
Helga spurði þá ráðherra hvernig hann ætlaði að mæta mönnunarvandanum þegar ríkisstjórnin væri að setja aðhaldskröfur á heilbrigðisstofnanir.
Willum sagði það ekki rétt þar sem engin aðhaldskrafa væri sett á heilbrigðisstofnanir næstu tvö árin.
