Stórleikarinn Will Smith sem ákvað að slá grínistann Chris Rock í andlitið eftir hann gerði grín að eiginkonu hans hefur nú sent frá sér afsökunarbeiðni.
„Ofbeldi í allri sinni mynd er eitrað og eyðileggjandi. Hegðun mín á Óskarsverðlaunahátíðinni í gærkvöldi var óásættanleg og óafsakanleg,“ segir Will í tilkynningunni. Hann segir brandarann um Jadu hafa gengið sér of nærri.
Eins og fram hefur komið gerði Chris Rock grín að hárleysi leikkonunnar, sem hefur snoðað sig í rúmt ár vegna sjálfsofnæmissjúkdóms. Chris líkti henni við G.I Jane á sviðinu og sló Will Smith hann í kjölfarið.
„Ég vil biðja þig opinberlega afsökunar Chris. Ég gekk yfir strikið og þetta var rangt af mér. Ég skammast mín og hegðun mín var ekki mér til sóma. Það er ekkert pláss fyrir ofbeldi í heimi ástar og gæsku.“
Þá biður leikarinn Akademíuna einnig afsökunar sem og framleiðendur hátíðarinnar og samstarfsfólk sitt í King Richard. Fréttir bárust í dag af því að Akademían hefði tilvikið til rannsóknar og hefði fundað á krísufundi eftir hátíðina í gær vegna þess.
„Ég sé innilega eftir hegðun minni, sem hefur sett blett á það sem hefur annars verið stórkostleg vegferð fyrir okkur öll. Ég er að vinna í sjálfum mér.“
