„Þið sem eruð að fara á eftirlaun á næstu 15-20 árum bíður sömu örlög, nema eitthvað verði að gert,“ segir Wilhelm Wessman, eftirlaunaþegi og fyrrverandi hótelstjóri.
Wilhelm er einn af þeim sem standa á bak við málssókn Gráa hersins gegn íslenska ríkinu. Grái herinn berst fyrir mannsæmandi kjörum og virðingu gagnvart eldri borgurum eins og segir á heimasíðu hans.
Wilhelm skrifar grein á Facebook þar sem hann hvetur fólk til að styðja málsóknarsjóð Gráa hersins.
„Við höfum búið við tvöfalda lífeyrisbyrði. Við sem teljumst til „The baby boomers“ kynslóð eftirstríðsáranna erum sennilega skattpíndasta kynslóð Íslandssögunar,“ segir Wilhelm en baby boomers-kynslóðin er hugtak sem stundum er haft um þá sem fæddust á árunum 1946 til 1964.
Wilhelm segir að nú sé nóg komið og því hafi mál verið höfðað gegn ríkinu sem var dómtekið þann 28. apríl síðastliðinn. Hann fer svo yfir rökin á bak við málssóknina.
„Í fyrsta lagi að hafa greitt iðgjöld til lífeyrissjóðanna og þar með sparað til efri áranna og í öðru lagi höfum við þessir sömu eldri borgarar haldið uppi kynslóðinni sem átti þess ekki kost að greiða í lífeyrissjóði. Tryggingastofnun ríkisins skerðir okkur í dag um allt að 56,9% af greiðslum úr lífeyrissjóði. Þegar einnig sé tekið tillit til tekjuskatta sé því um að ræða ígildi eignaupptöku á allt að 72,9% greiðslna frá ríkinu. Þið sem eruð að fara á eftirlaun á næstu 15-20 árum bíður sömu örlög, nema eitthvað verði að gert. Styðjið málsóknarsjóð Gráa hersins og takið höndum saman við okkur sem erum á eftirlaunum í dag, það er eina leiðin til að stöðva yfirgang ríkisvaldsins.“
Wilhelm skrifar svo undir pistilinn með eftirfarandi orðum:
„Wilhelm W.G.Wessman Baby boomer“
