Besta tæknin var ekki valin vegna nýrrar gas- og jarðgerðarstöðvar Sorpu sem kostað hefur 5,3 milljarða króna. Í umfjöllun nýjasta tölublaðs Stundarinnar kemur fram að svo virðist vera sem ódýrasta tæknin hafi orðið fyrir valinu.
Stundin heldur áfram að fjalla um málefni Sorpu og vísar meðal annars í úrskurði kærunefndar útboðsmála. Í úrskurði frá árinu 2016 kemur fram að tækni Aikan, sem varð hlutskarpast í útboði um stöðina, hafi fengið 62,5 stig við mat á tæknilegum eiginleikum. Önnur stöð, frá þýska fyrirtækinu BTA, fékk 86,5 stig. Tækni Aikan var hins vegar miklu ódýrari; hljóðaði tilboð þeirra upp á 13,3 milljónir evra en tilboð þýska fyrirtækisins 46,5 milljónum evra.
Síðar kom í ljós að villa var í tilboði Aikan á þá leið að tilboðið tilgreindi einungis rekstrarkostnað fyrir vélbúnað og byggingar í eitt ár en ekki fimmtán eins og kveðið var á um í útboðinu. Úr varð að Aikan breytti tilboði sínu sem varð 24,3 milljónir evra.
Í umfjöllun Stundarinnar kemur enn fremur fram að Sorpa hafi fengið ráðgjöf frá almannatenglafyrirtækinu Athygli vegna umræðu um framkvæmdirnar. Kolbeinn Marteinsson, framkvæmdastjóri Athygli, vildi ekki svara því hvort fyrirtækið vinni fyrir Sorpu og þá segir Stundin að Helgi Þór Ingason, framkvæmdastjóri Sorpu, hafi ekki svarað fyrirspurn um málið.
Talsvert hefur verið fjallað um málefni stöðvarinnar og þá einna helst kostnað við stöðina sem var verulega vanáætlaður. Gerðu áætlanir ráð fyrir 3,7 milljarða kostnaði en kostnaðurinn er nú kominn vel yfir 5 milljarða króna.
