„Við ætlum að koma saman í kvöld og kveikja á kertum fyrir hana,“ segir Steffen Petersen, góður vinur Freyju Egilsdóttur sem fannst látin í Danmörku í morgun, í samtali við vef Fréttablaðsins.
Fyrrverandi sambýlismaður Freyju, 51 árs Dani, hefur verið handtekinn grunaður um að hafa orðið henni að bana. Að því er fram kom í fréttum danskra fjölmiðla í morgun hefur hann játað sök.
Steffen og Freyja kynntust í SOSU Østjylland-skólanum fyrir þremur árum en skólinn undirbýr nemendur fyrir störf í félags- og heilbrigðisþjónustu. Bekkjarfélagarnir voru nánir og segir Steffen að Freyja hafi alltaf verið til staðar þegar á þurfti að halda og sett sína nánustu í fyrsta sætið. Hittust bekkjarfélagarnir oft utan skóla og gerðu sér dagamun.
Steffen segir í samtali við Fréttablaðið að þrír úr bekknum hennar hafi tekið þátt í leitinni að Freyju í gær eftir að lýst var eftir henni. „Í morgun komu svo þessar skelfilegu fréttir um það sem gerðist,“ segir Steffen sem minnist góðrar og glaðlyndrar vinkonu sem var ávallt tilbúinn að leggja fram sína aðstoð.
Ætla bekkjarfélagarnir sem fyrr segir að koma saman og kveikja á kertum.
