Kolbrún Baldursdóttir, borgarfulltrúi Flokks fólksins, vill að Reykjavíkurborg hafi bílastæðahús borgarinnar opin allan sólarhringinn og gjaldfrjáls frá klukkan 22 til 8 á morgnana.
Kolbrún skrifar um þetta í Morgunblaðið í dag.
Rökin sem Kolbrún kveðst hafa fengið gegn tillögunni eru þau að þá myndu tekjurnar af rekstri húsanna dragast saman um 5 til 10 milljónir á ári. Í umsögn vegna afgreiðslu tillögu Flokks fólksins um að hafa bílastæðahúsin opin allan sólarhringinn segir „að nýting húsanna á þessum tíma sé almennt lítil, 10-15% nýting ef langtímanotendur með mánaðarkort eru taldir með.“
Kolbrún bendir á að borgin hafi byggt mörg bílastæðahús en nýting þeirra sé ekki góð. „Það er erfitt að skilja þessa röksemdafærslu í ljósi slakrar nýtingar bílastæðahúsa. Ef notkun bílastæðahúsa er eins lítil og raun ber vitni ætti það ekki að valda miklum kostnaði þótt þau (eitt eða fleiri) verði gjaldfrjáls á nóttunni. Slík tilhögun myndi eflaust skila samfélaginu meiri ábata en sá 5-10 m. kr. tekjumissir sem borgin kann að verða af,“ segir hún.
Í dag fór fram umræða í borgarstjórn um bílastæðahús borgarinnar að beiðni Flokks fólksins. Er kallað eftir umræðu um aðgerðir til að gera bílastæðahúsin aðgengilegri, einfaldari, meira aðlaðandi og skilvirkari.
Kolbrún bendir á að gjalds í bílastæðahúsum sé krafist allan opnunartímann en gjald í bílastæðum á götum fylgi nokkurn vegin opnunartíma verslana. Þá taki bílastæðahús ekki við greiðslum frá snjallkerfum. Þá bendir hún að að bílastæðahús séu lokuð að nóttu en bílastæði á götum alltaf tiltæk.
„Næturlokun veldur því að sækja þarf bílinn fyrir kl. 24.00 ella bíða til morguns. Síðast en ekki síst eru mörg bílastæðahús illa lýst og kuldaleg. Sterkar vísbendingar eru um að fólk sem komið er á og yfir ákveðinn aldur noti ekki bílastæðahús. Margt eldra fólk segist heldur ekki treysta sér að eiga við miðakerfi greiðsluvélanna. Þetta má bæta með einföldum aðgerðum sem kosta lítið miðað við byggingarkostnað húsanna.“
Í grein sinni segir Kolbrún einnig að fulltrúi Flokks fólksins hafi lagt til að bjóða ókeypis stæði í t.d. 90 mínútur í bílastæðahúsum um helgar. Það myndi hvetja bílaeigendur sem ekki aka rafbílum til að leggja í bílastæðahúsi fremur en í götustæði.
„Bygging bílastæðahúsanna var veruleg fjárfesting og það er því öfugsnúið að reyna ekki að nýta þau sem best. Fjölmargar aðgerðir sem í hinu stóra samhengi kosta lítið falla á dauf eyru meirihlutans vegna þess eins að þær miða að því að bæta hag bifreiðareigenda. Það er t.d. rökleysa að halda því fram að bílastæðasjóður muni tapa tekjum þótt boðið sé upp á fáeinar ókeypis klukkustundir í bílastæðahúsi eða næturopnun. Taka á tillit til ábata borgarbúa af auknu aðgengi að bílastæðahúsum. Vill borgarmeirihlutinn fækka bílum á götum eða ekki?“
