Hópur Framsóknarmanna á Alþingi hefur lagt fram frumvarp sem myndi heimila Vínbúðunum að hafa opið á sunnudögum auk nokkurra frídaga, sumardaginn fyrsta, 1. maí, 17. júní og frídag verslunarmanna.
Hafdís Hrönn Hafsteinsdóttir er fyrsti flutningsmaður frumvarpsins, með henni eru þau Ágúst Bjarni Garðarsson, Jóhann Friðrik Friðriksson, Lilja Rannveig Sigurgeirsdóttir, Stefán Vagn Stefánsson og Þórarinn Ingi Pétursson.
Í greinargerð segir að bann af þessu tagi við „opnunartíma staða sem selja áfengi samræmist ekki tíðaranda samfélagsins“ og að breytingin stuðli að „frelsi til að veita og sækja þjónustu á framangreindum dögum.“
Þá sé eðlilegt að Vínbúðir hafi rétt til að ákveða opnunartíma án þess að það sé skilyrt í lögum. Þetta er ekki í sama anda og frumvörp Sjálfstæðismanna um frjálsa sölu. Þetta sé „til þess fallið að áfengi verði áfram selt í öruggu umhverfi þar sem eftirlit er með aldurstakmörkum og stuðlað að forvörnum“.
