Vilhjálmur H. Vilhjálmsson hæstaréttarlögmaður líkir atburðarásinni í máli Arnfríðar Einarsdóttur, sem í dag var skipuð dómari við Landsrétt, við þekkt kvæði Steins Steinarr.
Mikill styr hefur staðið um málið undanfarin misseri, eða allt síðan Sigríður Andersen, fyrrverandi dómsmálaráðherra, skipaði hana sem dómara við Landsrétt. Málið fór alla leið til Mannréttindadómstóls Evrópu sem taldi skipanir dómara við Landsrétt ólögmætar. Var það Vilhjálmur sjálfur sem flutti málið gegn íslenska ríkinu.
Dómnefnd um hæfni umsækjenda um embætti dómara mat Arnfríði hæfasta umsækjenda nú á dögunum og greindi RÚV frá því í dag að Áslaug Arna Sigurbjörnsdóttir hefði ákveðið að skipa hana frá næstu mánaðamótum.
Vilhjálmur skrifar færslu um málið þar sem hann veltir fyrir sér hvort um ævintýri eða íslenskan veruleika sé að ræða. Ber færslan yfirskriftina Búlúlala og er hún lauslega byggð á samnefndu ljóði Steins Steinarr. Gefum Vilhjálmi orðið:
„Árið 2017 skipaði Negus Negusi Abbessiníukeisari æskuvin sinn sem dómara við áfrýjunardómstól landsins. Æskuvinurinn var með embættispróf í lögfræði og uppfyllti almenn hæfisskilyrði. Hann var hins vegar ekki hæfastur í jobbið. Aðspurður um rökin fyrir skipuninni sagði Negusi Negusi: Búlúlala.
Árið 2019 var skipunin dæmd ólögmæt af alþjóðlegum dómstól. Æskuvinur keisarans hætti því að dæma. Árið 2020 ákvað keisarinn að skipa sama æskuvin aftur sem dómara við áfrýjunardómstólinn með þeim rökum að á þeim tíma sem æskuvinurinn var ólöglega skipaður sem dómari hefði hann öðlast ómetanlega dómarareynslu og væri því öðrum hæfari í jobbið.
Aðspurður um lögmæti skipunarinnar sagði Negus Negusi: Ég er Negus Negusi. Búlúlala.“
