Vil­hjálmur vill sæti Páls í Suður­kjör­dæmi

Vil­hjálmur Árna­son, þing­maður Sjálf­stæðis­flokksins, lýsir því yfir á Face­book síðu sinni í dag að hann sækist eftir odd­vita­sæti á lista Sjálf­stæðis­flokksins í Suður­kjör­dæmi fyrir þing­kosningar í haust.

Þetta kemur fram í Face­book færslu hjá Vil­hjálmi. Þar segir hann mikil­vægt að ný kyn­slóð halli sér völl og taki for­ystu í þeim verk­efnum sem fram­undan eru. „Ég hef metnað, reynslu og þekkingu til að leiða lista sjálf­stæðis­manna.“

Páll Magnús­son velti sjálfur Ragn­heiði Elínu Árna­dóttur úr sessi sem odd­viti flokksins í að­draganda síðustu þing­kosninga árið 2017. Hann hlaut 45,4 prósent at­kvæða.

Sagðist hann eftir kosningar ekki geta stutt ráð­herra­skipan sem Bjarni Bene­dikts­son, for­maður flokksins, hefði gert til­lögu um. Sagði hann í til­kynningu að skipanin, þar sem hann var ekki gerður að ráð­herra, hefði verið lítils­virðing gagn­vart Suður­kjör­dæmi, þar sem Sjálf­stæðis­flokkurinn hefði unnið sinn stærsta sigur í kosningunum.

Þá vakti það at­hygli að Páll studdi ekki fram­boð Sjálf­stæðis­flokksins í Vest­manna­eyjum í síðustu sveitar­stjórnar­kosningum. Var hann þess í stað sagður hafa stutt klofnings­fram­boðið Fyrir Heyma­ey, sem Íris Róberts­dóttir, nú­verandi bæjar­stjóri leiddi.

Var Páli að lokum vikið úr full­trúa­ráði Sjálf­stæðis­flokksins vegna fram­göngu sinnar í að­draganda kosninganna. Lýsti ráðið yfir fullu van­trausti á þing­manninn og sagðist ekki geta stutt Pál sem þing­mann kjör­dæmisins.