„Ég hef sagt og segi enn og aftur að það eigi og verði að endurskoða lífeyriskerfið enda elur það á mismunun, ójöfnuði og óréttlæti,“ segir Vilhjálmur Birgisson, formaður Verkalýðsfélags Akraness, í pistli á Facebook-síðu sinni.
Þar gerir hann lífeyriskerfið hér á landi að umtalsefni og segir hann það stórundarlegt að heyra hörðustu stuðningsmenn kerfisins dásama það í ræmur og tala um sem besta kerfi í heimi.
„Hvernig getur þetta verið besta kerfi í heimi, lífeyriskerfi sem tryggir að lágtekjufólk verður fátækt frá vöggu til grafar,“ spyr Vilhjálmur. Hann spyr enn fremur hvernig til dæmis verkalýðshreyfingin getur horft átölulaust á það hvernig verkafólk, sem ekki getur lifað á 100% lágmarkslaunum á meðan það er á vinnumarkaði, getur lifað á 76% af lágmarkslaunum þegar lætur af störfum á íslenskum vinnumarkaði.
„Þetta er bara einhver hagfræði sem ég ekki skil. Svo dásama sumir hugmyndafræðina í kringum svokallaða samtryggingu lífeyriskerfisins, en rétt að upplýsa að örorkubyrði lífeyrissjóða þar sem verkafólk er í miklum meirihluta er langtum meiri en í öðrum lífeyrissjóðum, til dæmis hjá fagmenntuðum,“ segir Vilhjálmur og bætir við að þetta leiði til þess að réttindi úr verkamannasjóðum eigi það til að vera mun minni en í þeim sjóðum þar sem örorkubyrði er minni.
„Svo kalla menn þetta samtryggingu þar sem lífeyriskerfið er innbyggt með þeim galla að níðst er á lágtekjufólki m.a. vegna þessa.“
Vilhjálmur er þeirrar skoðunar að endurskoða þurfi þetta kerfi þar sem hagsmunir lágtekjufólks verði skoðaðir sérstaklega. „Nú liggur t.d. fyrir að iðgjöld hafa hækkað á rétt rúmum 10 árum um 55% og dugar það ekki til að verja tryggingafræðilega stöðu sjóðanna og því er núna talað um að hækka þurfi lífeyristökualdurinn jafnvel upp í 80 ár.“
