Vilhjálmur Árnason þingmaður Sjálfstæðisflokks og formaður umhverfis- og samgöngunefndar vill meira gagnsæi um ákvarðanir heilbrigðisráðherra um aðgerðir vegna faraldurs Covid-19. Hann segir sumar aðgerðirnar orka tvímælis.
„Það er mikið af aðgerðunum sem maður upplifir mjög harðar eða mjög ónauðsynlegar. Sumar þeirra finnst okkur kannski mynda vissa sóun eða stangast á hvor við aðra. Það er verið að tala um að vernda líf og heilsu en ef við sköpum þannig andlegar og félagslegar aðstæður, þá getur líf og heilsa líka verið í hættu,“ sagði Vilhjálmur í Bítinu á Bylgjunni í morgun.
Hann vill að yfirvöld veiti rökstuðning fyrir aðgerðunum svo almenningur átti sig betur á því hvers vegna gripið er til þeirra.
„Ég held að það sé betra að fá fólk með sér í að fylgja aðgerðunum og skilja þær ef það er upplýst um rökin og það sé upplýst um það að það hafi fleiri sjónarhorn verið metin en bara hreinar sóttvarnir,“ sagði þingmaðurinn.
