Vilhjálmur Þ. Vilhjálmsson, fyrrverandi borgarstjóri Reykjavíkur, segir að stjórnleysi ríki í borginni. Vilhjálmur stingur niður penna í Morgunblaðinu í dag þar sem hann gagnrýnir meirihlutann harðlega.
„Á undanförnum árum hafa borgaryfirvöld lagt nánast alla áherslu á uppbyggingu í vesturhluta Reykjavíkur. Skipulagsstefna borgarinnar endurspeglast á því svæði í þéttsetnum háhýsum og flest bendir til þess að háhýsastefnu borgaryfirvalda verði viðhaldið næstu árin. Nefna mætti mörg dæmi um byggingu háhýsa víðs vegar í vesturhluta borgarinnar og fyrirhugaða byggingu slíkra húsa, meðal annars þar sem nú er bensínsala við mót Nesvegar og Ægisíðu. Heimilt verður að byggja þar fimm hæða fjölbýlishús á lóðinni með 50 íbúðum. Ekkert tillit hefur verið tekið til mótmæla íbúa á svæðinu,“ segir Vilhjálmur.
Hann gagnrýnir það að nánast engar lóðir undir sérbýli hafi verið til úthlutunar í Reykjavík síðustu átta árin. Þúsundir Reykvíkinga hafi flutt í önnur sveitarfélög en sem betur fer hafa hverfin í austurhluta borgarinnar að mestu verið látin í friði. Á næstunni standi þó til að byggja nokkur háhýsi í Mjóddinni vestan Bakkahverfis.
„Áherslur meirihlutans í borgarstjórn hafa fyrst og fremst beinst að uppbyggingu á miðborgarsvæðinu og í nærliggjandi hverfum. Það kann hugsanlega að endurspeglast í þeirri staðreynd að einungis fjórir borgarfulltrúar eiga heimili í austurhluta borgarinnar en 19 borgarfulltrúar í vesturhluta hennar. Nokkrir borgarfulltrúar Sjálfstæðisflokksins hafa þó með áberandi hætti sinnt málefnum austurhverfa borgarinnar.“
Vilhjálmur segir að fjármálastjórn borgarinnar hafi verið á brauðfótum undanfarin ár og eyðslustefna allsráðandi. Þá hafi tugir milljóna króna verið settir í margs konar gæluverkefni meirihlutans sem engu skila.
„Skuldir aukast stöðugt og A-hluti borgarsjóðs er rekinn með halla ár eftir ár. Öllum er ljóst, nema borgarfulltrúum meirihlutans, að það stefnir í enn alvarlegri fjárhagserfiðleika borgarsjóðs á þessu ári og þeim næstu. Það er ef til vill hægt að halda áfram með þessum hætti um stundarsakir en ekki til langs tíma. Endalaus skuldaaukning og óstjórn fjármála hefur sínar alvarlegu afleiðingar fyrr en síðar. Borgarfulltrúar meirihlutans ættu að kynna sér siðareglur borgarfulltrúa en þar segir í 7. lið: „Við förum vel með fjármuni borgarinnar og eignir hennar.“
Vilhjálmur segir í grein sinni að núverandi tillögur um lagningu borgarlínu muni aldrei ganga upp.
„Fjármögnun í þessa glórulausu framkvæmd er með þeim hætti að hlutur ríkis var áætlaður á verðlagi 2019 um 43 milljarðar króna en hlutur Reykjavíkurborgar um fjórir milljarðar króna. Ljóst er að þessar tölur hafa hækkað töluvert síðustu árin. Stefnt er að því að fjármagna borgarlínuframkvæmdir að hluta með veggjöldum en óljóst er hvernig því verður hagað. Nú er unnið með mjög dýra útfærslu borgarlínu, sem margar borgir stefndu upphaflega að en völdu á endanum verulega ódýrari útfærslu. Hvorki borgarsjóður né ríkissjóður hafa efni á því að sólunda tugum milljarða króna í þessa framkvæmd. Ábyrgð þeirra sem sýsla með almannafé er mikil og því verður vart trúað að ríkisstjórnin átti sig ekki á þeirri staðreynd. Meirihluti borgarstjórnar gerir það ekki.“
