Vilhjálmur Birgisson, formaður Starfsgreinasambandsins, segir aðgerðarleysi stjórnvalda og þingmanna hrópandi vegna efnahagsástandsins sem núna er uppi.
„Eina sem stýrivaxtahækkanir hafa gert er að færa fé frá skuldsettum heimilum og fyrirtækjum yfir til fjármálakerfisins og ofurríkra fjármagnseigenda. Munum að frá bankahruninu hafa viðskiptabankarnir þrír skilað yfir 1000 milljörðum í hagnað!“ skrifar Vilhjálmur á Facebook.
Vilhjálmur deilir síðan frétt Vísis með færslunni og segir að eins fram kemur í henni mun hækkandi vaxtastig auka vaxtatekjur bankanna verulega enda eru vaxtatekjur bankanna stærsti tekjuliður þeirra.
„Gríðarlegar vaxtahækkanir Seðlabankans að undanförnu hafa lent af fullum þunga á heimilum og hafa þúsundir heimila og leigjenda þurft að þola tugþúsunda hækkun á greiðslubyrgði á mánuði. Það er með ólíkindum að almenningur, heimili og fyrirtæki láti það viðgangast að verið sé að færa gríðarlega fjárhæðir í hverjum mánuði frá skuldsettum heimilum og fyrirtækja yfir til fjármálaelítunnar,“ skrifar Vilhjálmur.
„Aðgerðaleysi stjórnvalda og þingmanna er hrópandi þegar verið er að níðast heimilum með slíkum okurvaxtahækkunum mánuð eftir mánuð. Nú er ekkert annað í stöðunni fyrir verkalýðshreyfinguna en að byrja að undirbúa verkfallsaðgerðir og vera klár í slaginn í haust þegar kjarasamningar renna út.“
„Það er allavega eitt víst að ekki er hægt að horfa aðgerðalaus á Seðlabankann þurrka upp allan ávinninginn sem við náðum í síðasta kjarasamningi og færa þann ávinning yfir til fjármálkerfisins. Nú er komið að samstöðu alls launafólks og vinna bug á þessu ofbeldi sem heimili og launafólk hafa þurft að búa við áratug eftir áratug.“
„Það er þyngra en tárum taki að hlusta á rök Seðlabankans að þessar vaxtahækkanir séu gerðir með hagsmuni heimila og fyrirtækja að leiðarljósi, þvílíkt djöfulsins rugl og kjaftæði.
Við launafólk vil ég segja, það reynir á okkur að brjóta þetta vaxtaofbeldi á bak aftur í komandi kjarasamningum og ef það þarf verkfallsaðgerðir til þess, þá verður svo að vera, enda ekki hægt að horfa uppá þetta átölulaust stundinni lengur! Ég ítreka að allur ávinningur af síðasta kjarasamningi hefur verið færður frá launafólki yfir til fjármálaelítunnar,“ skrifar Vilhjálmur að lokum.
