Vilhjálmur Birgisson, formaður Verkalýðsfélags Akraness, segir að ef það reynist rétt að Icelandair Group íhugi að ráða flugfreyjur sem standa utan Flugfreyjufélags Íslands sé það ein alvarlegasta árás sem gerð hefur verið á kjarabaráttu launafólks hér á landi.
Markaðurinn í Fréttablaðinu greinir frá því í dag að Icelandair Group gæti látið reyna á kjarasamningsákvæði fyrir félagsdómi svo unnt sé að ráða flugfreyjur utan stéttarfélags flugfreyja. Samkvæmt heimildum Markaðarins er þetta valmöguleiki sem stjórnendur Icelandair Group eru sagðir íhuga að grípa til ef ekki nást samningar.
Eins og flestum er kunnugt er staða Icelandair mjög veik um þessar mundir og hefur félagið leitað allra leiða við að lækka launakostnað sinn.
Icelandair hefur þegar samið við flugmenn og flugvirkja, en félagið freistar þess að ná fram yfir 20 prósenta hagræðingu í launakostnaði fyrir hluthafafund á föstudaginn þar sem tekin verður ákvörðun um liðlega 30 milljarða hlutafjárútboð.
Vilhjálmur Birgisson er mjög óhress með þetta og segir:
„Ef þessi hótun er staðreynd þá er þetta ein mesta og hættulegasta árás sem gerð hefur verið á kjarabaráttu launafólks í sögu verkalýðshreyfingarinnar. Það er morgunljóst að verkalýðshreyfingin í heild sinni hlýtur að sjá til þess að ef þessi hótun raungerist að ekki fari ein einasta króna úr lífeyrissjóðum launafólks í komandi hlutafjárútboð hjá Icelandair.
Þetta er ógeðfelld hótun, ef sönn er!“
