Vilhjálmur Birgisson, formaður Verkalýðsfélags Akraness, sendir skýr skilaboð til þeirra sem segja að stóriðjan fái raforkuna á gefins, eða því sem næst.
„Mikið hefur verið fjallað um í fréttum á liðnum dögum að allur sjávarútvegurinn sé að greiða 4,8 milljarða í auðlindagjöld fyrir afnot af sjávarauðlindinni og finnst mörgum að það sé of lítið. Ég ætla svo sem ekkert að leggja mat á það,“ segir Vilhjálmur í færslu á Facebook-síðu sinni.
Hann bætir við:
„Ég vil hinsvegar benda öllum þeim sem segja að verið sé að "gefa" stóriðjunni á Íslandi raforkuna og að þessi fyrirtæki skili „engu“ til íslensks samfélags á þá bláköldu staðreynd að „bara“ Elkem Ísland á Grundartanga greiðir nánast sömu upphæð og öll auðlindagjöld í sjávarútvegi nema eða 4,8 milljarð fyrir raforkuna.“
Vilhjálmur bætir við að rétt sé að geta þess að Norðurál á Grundartanga greiðir nálægt 13 milljörðum á ári fyrir alla sína raforku. Það er 63% meira en allur íslenskur sjávarútvegur greiðir í auðlindagjöld.
„Þetta eru staðreyndir og sýnir og sannar hversu gríðarlega mikilvægur þessi iðnaður er fyrir íslenskt samfélag!“
Veiðigjöld síðasta árs lækkuðu um 1,8 milljarða króna frá árinu 2019 og um 6,5 milljarða króna frá árinu 2019. Brim greiðir hæstu gjöldin, 367 milljónir króna, en Samherji greiðir 281 milljón króna.
