„Ég vil hins vegar brýna fyrir öllum sem ekki hafa endurfjármagnað húsnæðislán sín að gera það hið snarasta enda miklir hagsmunir í húfi,“ segir Vilhjálmur Birgisson, formaður Verkalýðsfélags Akraness og fyrrverandi varaforseti ASÍ.
Vilhjálmur bendir á það í nýjum pistli á Facebook-síðu sinni að vaxtalækkanir að undanförnu hafi haft mikil áhrif á húsnæðislán landsmanna. Segir hann að eitt af aðalmarkmiðum lífskjarasamningsins hafi verið að semja á þeim forsendum að samningurinn myndi skapa grundvöll til vaxtalækkunar og með vaxtalækkun væri markmiðið að auka ráðstöfunartekjur fólks.
„Nú hefur komið í ljós að þetta markmið lífskjarasamningsins hefur heppnast,“ segir hann og bætir við að hann hafi verið að skoða hvernig vaxtalækkun hefur skilað sér frá því að lífskjarasamningurinn var undirritaður þann 3. apríl 2019. Segir Vilhjálmur það afar ánægjulegt að greiðslubyrði á óverðtryggðu láni hafi lækkað um 29,56% og á verðtryggðu láni um 22,4% frá undirritun samningsins.
Vilhjálmur tekur þetta svo saman í dæmi. Gefum honum orðið:
„Við skoðuðum breytingu á vaxtakjörum í Landsbankanum fyrir lífskjarasamninginn og eins og staðan er í dag er breytingin með eftirfarandi hætti:
Vextir hjá Landsbankanum miðað við 70% veðsetningarhlutfall:
Lægstu verðtryggðu vextirnir voru 3,55% þann 3. apríl 2019 (Breytilegir verðtryggðir vextir)
Breytilegir verðtryggðir vextir 24. júní 2020 eru 2,00%
Verðtryggðir vextir hafa lækkað um 1,55% stig
Óverðtryggðir vextir hjá Landsbankanum:
Lægstu óverðtryggðu vextirnir 3. apríl 2019 voru 6,00%
Lægstu óverðtryggðu vextirnir 24. júní 2020 eru 3,50%
Óverðtryggðir vextir hafa lækkað um 2,50% stig
Við skoðuðum einnig hvernig greiðslubyrðin hefur breyst á þessu tímabili og hún er eftirfarandi miðað við neðangreindar forsendur:
- Forsendur: 28 m.kr. verðtryggt jafngreiðslulán til 40 ára:
- Lán tekið 3. apríl 2019. Greiðslubyrði á mánuði 111.104 kr.
- Lán tekið 24. júní 2020. Greiðslubyrði á mánuði 86.214 kr.
- Greiðslubyrði hefur lækkað um 24.890 kr. á mánuði (22,4%)
- Lækkun á vöxtum jafngildir að lán sem tekið væri í dag gæti verið til 28 ára í stað 40 ára.
- Forsendur: 28 m.kr. óverðtryggt jafngreiðslulán til 40 ára.
- Lán tekið 3. apríl 2019. Greiðslubyrði á mánuði 154.200 kr.
- Lán tekið 24. júní 2020. Greiðslubyrði á mánuði 108.610 kr.
- Greiðslubyrði hefur lækkað um 45.590 kr. á mánuði (29,56%)
Takið eftir ráðstöfunartekjur af óverðtryggða láninu hefur lækkað um 45.590 kr. á mánuði eða sem nemur 547.080 á ársgrundvelli og á verðtryggða láninu um 24.890 kr. á mánuði eða sem nemur 298.680 kr. á ársgrundvelli.“
Vilhjálmur segir ljóst að aðalmarkmiðið við gerð lífskjarasamningsins hafi svo sannarlega skilað félagsmönnum hærri ráðstöfunartekjum. Kveðst Vilhjálmur vera stoltur af því að hafa tekið þátt í samningurinn. Vilhjálmur hefur áður sagt að lífskjarasamningurinn sé einn albesti kjarasamningur sem hann hefur komið að enda ávinningurinn umtalsverður. Vilhjálmur endar pistilinn þó á mikilvægum skilaboðum til fólks:
„Ég vil hins vegar brýna fyrir öllum sem ekki hafa endurfjármagnað húsnæðislán sín að gera það hið snarasta enda miklir hagsmunir í húfi.“
