Vilhjálmur Birgisson, formaður Starfsgreinasambandsins, krefst þess að stjórnvöld komi leigjendum og heimilum þessa lands til aðstoðar án tafar.
Vilhjálmur birti færslu á Facebook-síðu sinni í morgun þar sem hann segir frá einstæðri móður sem leigir hjá Ölmu leigufélagi. Konan sendi honum tölvupóst fyrir ári síðan þegar leigufélagið hækkaði leiguna úr 199 þúsund krónum í 225 þúsund krónur.
Um er að ræða vísitölutengdan samning og í verðbólguástandi eins og nú ríkir hækkar leigan frá mánuði til mánaðar.
Í færslu sinni segir Vilhjálmur að vísitöluhækkunin virðist ekki vera nóg því þessari sömu konu hafi verið tilkynnt að ef hún vilji endurnýja leigusamninginn fari leigan í 267 þúsund krónur á mánuði. Ef fer sem horfir hafi leigan hækkað á tólf mánuðum um 42%, eða langt umfram neysluvísitölu.
„Þessi einstæða móðir hefur leigt hjá Ölmu í 2 ár en í byrjun leigði hún á 190.000 kr. og núna tveimur árum seinna er leigan að fara í 267.000 kr. og hefur því hækkað um 77.000 kr.,“ segir Vilhjálmur um þetta tiltekna dæmi.
„Ég spyr ætla stjórnvöld enn og aftur að horfa átölulaust á þetta ofbeldi sem leigjendur þurfa að þola án þess að grípa til aðgerða til hjálpar þessu fólki? Aðgerðaleysi þeirra gagnvart leigjendum og vanda heimilanna er æpandi,“ segir Vilhjálmur sem gagnrýnir einnig lífeyrissjóði fyrir fjárfestingar sínar í leigufélagi sem „níðist“ á leigjendum. Nefnir hann Festu lífeyrissjóð sérstaklega og krefst hann þess að sjóðurinn selji skuldabréf sín í Ölmu.
„Ég krefst þess einnig að stjórnvöld komi leigjendum og heimilum þessa lands til aðstoðar án tafar því það verður að stoppa af þessa græðgisvæðingu sem tröllríður íslensku viðskiptalífi,“ segir hann.
