„Nú þegar sótt er að réttindum starfsmanna Icelandair eins og enginn sé morgundagurinn er rétt að rifja upp ævintýralegan hagnað fyrirtækisins frá árinu 2016,“ segir Vilhjálmur Birgisson, formaður Verkalýðsfélags Akraness.
Vilhjálmur rifjar upp frétt frá árinu 2016 þar sem greint var frá miklum hagnaði Icelandair á árinu 2015. Nam hann rúmum 111 milljónum Bandaríkjadala, 14,3 milljörðum króna á þáverandi gengi. Þá kom fram að félagið hygðist greiða hluthöfum sínum 3,5 milljarða króna í arð.
„Þegar þessi hagnaður átti sér stað þá hafa væntanlega ekki verið nein ákvæði í kjarasamningum sem kváðu á um að starfsmenn gætu tekið upp kjarasamninga til að fá hlutdeild í góðri afkomu félagsins,“ segir Vilhjálmur en eins og kunnugt er vill Icelandair lækka launakostnað sinn verulega. Telja stjórnendur félagsins að það sé forsenda fyrir því að félagið geti hreinlega haldið velli.
„Núna þegar harðnar á dalnum þá á að leggja allar byrðar á herðar hins almenna starfsmanns með slagorðum sem lúta að því að framtíð félagsins ráðist á því að launafólk afsali sé stórum hluta sinna réttinda,“ segir Vilhjálmur sem er ekki þekktur fyrir að liggja á skoðunum sínum.
Hann endar færslu sína á Facebook á þessum orðum:
„Orð eins og við séum öll í sama bátnum eru orðin hálf klisjukennd. Kannski má líkja þessum bát við hálfgerða galeiðu þar sem almennt launafólk er hlekkjað með keðjum á neðra þilfari, á meðan forstjóraelítan er á efra þilfari með kampavín og kavíar, enda sýnir sagan okkur enn og aftur að gróðinn er ætíð einkavæddur en tapið ríkisvætt.“
