Vil­hjálmur illur: Hjólar í Bjarna og Framsókn – „Við því segi ég sveiattan“

„Jæja, þá er það orðið ljóst að ekki nokkurn vilja er að finna hjá ríkis­stjórninni að verja ís­lensk heimili fyrir hugsan­legu verð­bólgu­skoti vegna falls krónunnar og þeirra af­leiðinga sem Kórónu­far­aldurinn getur hugsan­lega haft á verð­lags­þróun hér á landi.“

Þetta segir Vil­hjálmur Birgis­son, for­maður Verka­lýðs­fé­lags Akra­ness, í pistli á Face­book-síðu sinni. Vil­hjálmur hefur talað mikið fyrir því að undan­förnu að frysta vísi­tölu neyslu­verðs til að verja heimilin fyrir mögu­legu verð­bólgu­skoti.

Í pistli sínum á Face­book segir Vil­hjálmur ljóst að enginn vilji sé fyrir því að verja heimilin fyrir verð­bólgu­skoti. Vísar hann í orð Bjarna Bene­dikts­sonar fjár­mála­ráð­herra á Al­þingi í gær þegar hann var spurður hvers vegna verð­tryggingin væri ekki tekin úr sam­band.

„Fjármálaelítan varin með kjafti og klóm“

Guð­mundur Ingi Kristins­son, þing­maður Flokks fólksins, lagði fyrir­spurnina fram í ó­undir­búnum fyrir­spurnum í gær.

„Fjár­mála­ráð­herra sagði það hins vegar stór­mál að taka verð­trygginguna úr sam­bandi og einnig sagði hann: „Það er ein­hver við­takandi á hinum endanum.“

Vil­hjálmur segir það rétt hjá Bjarna að það er ein­hver við­takandi á hinum endanum. „Og ég get upp­lýst fjár­mála­ráð­herra um að það er fjár­málaelítan sem er á hinum endanum fyrst og fremst og hana vill hann verja með kjafti og klóm.“

Vil­hjálmur segir að Bjarna hafi ætíð verið um­hugað um að verja þá ríku á kostnað hina skuldugu, „enda virðist hann og hans ríkis­stjórn ætíð vera til­búin að slá öflugum varnar­búr í kringum fjár­magns­eig­endur á kostnað heimilanna.“

Nýta sér úrræði en greiða milljarða í arð

Vil­hjálmur heldur gagn­rýni sinni á­fram og segir ömur­legt að vita til þess að ríkis­stjórninni vefjist ekki tunga um tönn þegar kemur að því að pumpa fjár­magni frá skatt­greið­endum til bjargar at­vinnu­lífinu. Á sama tíma og ekki kemur til greina að verja heimilin fyrir hugsan­legu verð­bólgu­skoti.

„Meira segja eru nokkur stór­fyrir­tæki sem nýta sér úr­ræði stjórn­valda sem skatt­greið­endur munu koma til með að fjár­magna og það þrátt fyrir að hafa skilað gríðar­legum hagnaði á undan­förnum árum og greitt milljarða, jafn­vel tugi milljarða í arð­greiðslur til eig­enda.

Ekkert mál að láta skatt­greið­endur fjár­magna slík úr­ræði, en að verja heimilin, nei það kemur ekki til greina, enda má fórna þeim á altari verð­tryggingar eins og gert var í hruninu ef svo ber undir.“

Skellir Framsókn á lærið

Vil­hjálmur hjólar svo í Fram­sóknar­flokkinn en flokkurinn hefur á undan­förnum árum talað fyrir af­námi verð­tryggingar.

„Það er reyndar orðið sorg­legt og grát­bros­legt að sjá hvernig fram­sóknar­flokkurinn lætur fjár­mála­ráð­herra skella sér enn og aftur á lærið og nægir í því sam­hengi að rifja upp að for­maður fram­sóknar­flokksins sagði í fréttum 23. mars síðastiðinn að verið væri að skoða hjá ríkis­stjórninni að setja þak á verð­trygginguna til að verja heimilin. Nei, segir fjár­mála­ráð­herra, enda virðast fram­sóknar­menn ráða greini­lega afar litlu í þessu stjórnar­sam­starfi.“

Vil­hjálmur segir að greini­lega eigi að skilja ís­lensk heimili eftir varnar­laus á meðan hver að­gerða­pakkinn á eftir öðrum, handa fjár­magninu og at­vinnu­lífinu, er kynntur á kostnað skatt­greið­enda.

„Við því segi ég, sveiattan. Að lokum vil ég rifja upp að ís­lensk heimili skulda upp­undir 2000 milljarða í verð­tryggðum skuldum sem þýðir að 2% verð­bólgu­skot hækkar höfuð­stól verð­tryggðra skulda um 40 milljarða!“