Vilhjálmur Birgisson, formaður Verkalýðsfélags Akraness og fyrrverandi varaforseti ASÍ, segir það löngu orðið ljóst að Sjálfstæðisflokkurinn hikar ekki við að svíkja gefin loforð. Vilhjálmur skrifar pistil á Facebook-síðu sína þar sem hann segir að enn og aftur virðist stjórnvöld vera að svíkja gefin loforð um afnám verðtryggingar.
„Ein af aðalástæðum þess að okkur tókst að ganga frá lífskjarasamningum sem undirritaður var 3. apríl 2019 var skrifleg yfirlýsing ríkisstjórnarinnar í sjö liðum um að stígið yrði kröftug skref til afnáms verðtryggingar,“ segir Vilhjálmur en hann leiddi viðræður um yfirlýsingu stjórnvalda fyrir hönd verkalýðshreyfingarinnar. Segist Vilhjálmur hafa verið í beinu sambandi við Bjarna Benediktsson fjármálaráðherra um útfærslu á yfirlýsingunni.
Svikin loforð
„Nú hefur komið í ljós að enn og aftur stefnir allt í að það eigi að svíkja þetta loforð,“ segir Vilhjálmur sem vísar í þriðja lið yfirlýsingarinnar þar sem segir:
„Frá og með ársbyrjun 2020 verði óheimilt að veita verðtryggð jafngreiðslulán til neytenda til lengri tíma en 25 ára nema með ákveðnum skilyrðum. Rökin fyrir þessu felast fyrst og fremst í þeim ókostum verðtryggðra jafngreiðslulána að verðbótum er bætt við höfuðstól lánsins og greiðslu þeirra frestað þannig að eignamyndun verður hægari en ella og líkur á neikvæðu eigin fé lántaka aukast.“
Vilhjálmur segir að ekkert bóli á frumvarpi um bann við 40 ára jafngreiðslulánum og bendir Vilhjálmur á að bannið hefði – að óbreyttu – átt að taka gildi um síðustu áramót.
„Hins vegar veit ég til þess að fjármálaráðherra hafði í hyggju að leggja fram frumvarp þar sem undanþágur verði með þeim hætti að nánast allir sem vilja geta haldið áfram að taka þessi 40 ára lán. Með öðrum orðum fjármálaráðherra ætlar að svíkja loforð sem ríkisstjórnin gerði samhliða lífskjarasamningum.“
Sorglegt að Framsókn fari sömu leið
Vilhjálmur rifjar upp að mörg ár séu liðin síðan farið var að lofa afnámi verðtryggingarinnar. Það gerðist til dæmis í kosningunum 2013 þegar Framsóknarflokkurinn og Sjálfstæðisflokkurinn voru saman í ríkisstjórn.
„Sú ríkisstjórn skipaði sérfræðingahóp um afnám verðtryggingar árið 2013 og komst sá sérfræðingahópur að þeirri niðurstöðu að það yrði að banna 40 ára verðtryggð jafngreiðslulán vegna þess að þau væru baneitraður kokteill og lagði sérfræðingahópurinn til að þessi lán yrðu bönnuð frá og með 1. janúar 2015.“
Vilhjálmur segir að þetta hafi að sjálfsögðu verið svikið og nú ætli sömu flokkar, það er að segja Sjálfstæðisflokkur og Framsóknarflokkur sem eru í ríkisstjórn, enn og aftur að svíkja undirritaða yfirlýsingu um bann við 40 ára verðtryggðum jafngreiðslulánum.
„Það er löngu orðið ljóst að Sjálfstæðisflokkurinn vílar ekki fyrir sér að svíkja gefin loforð eins og enginn sé morgundagurinn þegar kemur að hagsmunum alþýðunnar. Það er hins vegar sorglegt að Framsóknarflokkurinn ætlar enn og aftur að hlýða sjálfstæðisflokknum eins og þægur heimilishundur.“
Þýðir lítið að kaupa dýrar auglýsingar
Vilhjálmur segir að það komi honum ekki á óvart að Sjálfstæðisflokkurinn svíki þetta loforð, „enda eru þeir og hafa alltaf verið helstu varðhundar fjármagnsins á kostnað alþýðunnar en að Framsóknarflokkurinn skuli enn og aftur láta rassskella sig í verðtryggingarmálunum er rannsóknarefni.“
Vilhjálmur endar pistilinn á þessum orðum:
„Held að það þýði lítið fyrir Framsóknarflokkinn að kaupa dýrar auglýsingar fyrir næstu kosningar í ljósi þessara svika enn og aftur!
Það er hins vegar orðið ljóst að þessi svik ásamt fleiri atriðum geta sett lífskjarasamninginn í uppnám þegar kemur að endurskoðun í september á því hvort segja eigi samningum upp.
Það er allavega gjörsamlega óþolandi og ólíðandi að stjórnmálamenn geti komist síendurtekið upp með að svíkja gefin loforð án þess að slíkt hafi afleiðingar í för með sér.“
