Vilhjálmur Birgisson, formaður Verkalýðsfélags Akraness, svarar grein Drífu Snædal „Átökin í verkalýðshreyfingunni“ fullum hálsi í nýjum pistli á Vísir.is
„Það er greinilegt að örvænting Drífu Snædal forseta ASÍ er algjör en í þessari grein sem ber heitið „Átökin í verkalýðshreyfingunni“ er sannleikurinn og staðreyndir algjört aukaatriði. Ég ætla í þessari grein að fjalla um það sem lýtur að mér sem fyrsta varaforseta og afsögn mína 1. apríl 2020,“ skrifar Vilhjálmur.
„Eins og flestir vita þá var Drífa kosin forseti ASÍ árið 2018 og ég sem 1 varaforseti og Kristján Þórður 2. varaforseti. En þessi breyting á forsetateyminu kom til eftir að Sólveg Anna vann yfirburðasigur í formannskjöri í Eflingu 2017 og það myndaðist meirihluti inná þinginu fyrir raunverulegum breytingum. Það var gríðarlegt ákall frá hinum almenna félagsmanni um breytingar á ASÍ enda hafði ASÍ skrapað botninn í öllum skoðanakönnunum sem gerðar hefðu verið.“
Hann viðurkennir fúslega að hann hafði miklar væntingar með þessari breytingu yrðu miklar jákvæðar breytingar á stjórnunarháttum ASÍ.
„ Ekki leið langur tími þar til ég áttaði mig á því að lítið hafði breyst við þessi forsetaskipti og voru miklir samstarfsörðugleikar milli mín og forseta ASÍ. Þessar staðreyndir liggja bæði í tölvupóstsamskiptum og einnig áttum við nokkra fundi með forseta ASÍ ég, Ragnar Þór og Sólveig Anna þar sem þessi samstarfsörðugleikar og slæma upplýsingagjöf var rædd og reynt að vinna lausn á þessum vanda.“
„Forseti ASÍ átti ekki bara í samskiptaörðugleikum við mig sem 1. varaforseta heldur var einnig djúpstæður ágreiningur milli Ragnars Þórs sem hann hefur svo sem fjallað um og einnig var mikill ágreiningur um hinar ýmsu verkalýðspólitísku leiðir milli Sólveigar Önnu og Drífu,“ skrifar Vilhjálmur
Hann rekur síðan aðdragandann að uppsögn sinni sem 1. varaforseti ASÍ en hægt er að lesa grein Vilhjálms í heild sinni hér.
