Vilhjálmur finnur til með Einari: „Bíður afar erfitt verkefni“

Vilhjálmur Þ. Vilhjálmsson, fyrrverandi borgarstjóri, segir að Einars Þorsteinssonar bíði mjög erfitt verkefni þegar hann tekur við sem borgarstjóri af Degi B. Eggertssyni á næsta ári.

Vilhjálmur skrifar grein í Morgunblaðið í dag þar sem hann gagnrýnir meirihlutann í borginni harðlega, en Vilhjálmur hefur skotið föstum skotum að Degi og kollegum hans í Morgunblaðsgreinum sínum að undanförnu.

Vilhjálmur segir meðal annars að sýndarmennska og óraunhæfi hafi lengi átt samleið með borgarstjóra. Vísar hann meðal annars í afgreiðslu fjárhagsáætlunar borgarinnar

„Hann full­yrti að til­lög­ur meiri­hlut­ans væru fag­leg­ar og bitnuðu ekki á grunnþjón­ustu né ung­menn­um og æsku­lýðsstarfi. Al­gjör­lega inn­an­tóm­ar yf­ir­lýs­ing­ar. Reynsl­an af störf­um borg­ar­stjóra og meiri­hlut­ans í borg­ar­stjórn und­an­far­in kjör­tíma­bil er sú að fjár­hags­áætlan­ir meiri­hlut­ans hafa síður en svo verið fag­leg­ar og fæst­ar þeirra staðist, frem­ur flokk­ast und­ir ósk­hyggju.“

Hann gagnrýnir ekki bara Dag og Samfylkinguna heldur fá Píratar og Viðreisn einnig að finna fyrir því.

Í grein sinni bendir hann á að meirihlutinn í borgarstjórn hafi lagt fram 92 tillögur við afgeiðslu fjárhagsáætlunar borgarinnar fyrir árið 2023 til að mæta gríðarlegum hallarekstri borgarsjóðs.

„Þegar þess­ar til­lög­ur eru skoðaðar og rýnd­ar sést vel að þær eru að mestu sýnd­ar­mennsk­an ein, ekki unn­ar fag­lega og síður en svo velt við hverri krónu. Ekki síst vek­ur at­hygli að ráðist er á mál­efni sem tengj­ast börn­um og ung­ling­um. Þess í stað er haldið áfram mikl­um fjár­veit­ing­um í ýmis rán­dýr gælu­verk­efni meiri­hlut­ans.“

Hann veltir svo fyrir sér hverju Framsóknarflokkurinn fékk áorkað við gerð fjárhagsáætlunar vegna ársins 2023 þar sem fá ef nokkur merki sjást til batnaðar.

„Áfram þung­lama­leg og flók­in stjórn­sýsla. Fjár­mál­in í ólestri. Nán­ast ekk­ert fram­boð á lóðum und­ir sér­býli. Fyrst og fremst byggðir há­reist­ir íbúðat­urn­ar. Ný íbúðarbygg­ing­ar­svæði í fyrsta lagi árið 2025. Boðaður sex millj­arða halli á rekstri borg­ar­sjóðs. Aug­ljóst er að verðandi borg­ar­stjóra bíður afar erfitt verk­efni. Það auðveld­ar hon­um vissu­lega ekki starfið að vera með frá­far­andi borg­ar­stjóra í bak­sæt­inu.“