„Hvernig geta stjórnmálamenn og stjórnvöld látið þetta viðgangast gagnvart leigjendum og íslenskum heimilum,“ spyr Vilhjálmur Birgisson, formaður Starfsgreinasambandsins, í pistli á Facebook-síðu sinni.
Vilhjálmur gerir þar verðbólguna að umtalsefni og bendir á að í hverjum mánuði sé gefin út svokölluð Samræmd vísitala neysluverðs sem alls 27 aðildarþjóðir ESB og EES eru aðilar að.
Vísar Vilhjálmur í skýringu á vef Hagstofunnar þar sem segir:
„Þátttökuríkin þurftu að uppfylla viss skilyrði til fá að taka þátt í bandalaginu. Eitt þeirra var um viðmiðunarmörk fyrir verðbólgu. Nauðsynlegt þótti því að taka upp samræmdan mælikvarða fyrir verðbólgu innan Evrópusambandsins. Til undirbúnings á útreikningi á samræmdu vísitölunni hófst umfangsmikil samræmingarvinna þegar árið 1993. Sú vinna stendur enn og hefur Ísland tekið fullan þátt í henni frá upphafi. Í kjölfar þessarar undirbúningsvinnu hefur Evrópusambandið gefið út leiðbeiningar og sett lög um hvaða aðferðum skuli beita við útreikning vísitölunnar. Samræmd vísitala neysluverðs fyrir EES ríki er reiknuð mánaðarlega“.
Vilhjálmur segir að í öllum þessum 27 löndum sé þessi samræmda vísitala neysluverðs reiknuð út nákvæmlega eins.
„En hver er munurinn á íslensku verðbólgunni og Samræmdu vísitölu neysluverðs? Jú, þá er bara best að vitna beint í vef Hagstofunnar sem segir orðrétt um muninn á milli íslensku vísitölunnar sem notuð er hér á landi og byggir grunn fyrir verðtryggðar fjárskuldbindingar heimilanna og fyrirtækjanna,“ segir Vilhjálmur og vísar í upplýsingar á vef Hagstofunnar:
„Samræmda vísitalan er að mestu leyti undirvísitala þeirrar íslensku þó munur sé á umfangi þeirra. Mestu munar að eigið húsnæði er ekki með í samræmdu vísitölunni“.
„Takið eftir hún er að mestu leyti undirvísitala þeirrar íslensku, eina sem munar er að eigið húsnæði er ekki inni í samræmdu vísitölunni en það er sá liður sem hefur keyrt upp verðbólguna hér á landi.“
Vilhjálmur birtir mynd máli sínu til stuðings sem sýnir að 12 mánaða verðbólga á Íslandi í júní miðað við þessi 27 lönd næst lægst, eða 5,4%, en á sama tíma hafi íslenska vísitalan sem við notum verið 8,8%, eða 3.4% meiri bara vegna þess að við mælum með öðrum hætti en gert er í samræmdu vísitölunni.
„Það liggur fyrir að húsnæðisliðurinn hefur keyrt um 50% af allri verðbólgu síðustu 10 til 15 ár með skelfilegum kostnaði fyrir íslensk heimili sem og leigjendur og það er óskiljanlegt að við skulum hafa eigið húsnæði inni í mælingunni. Þessi 3,4% munur á milli íslensku vísitölunnar og samræmdu vísitölu neysluverðs kostaði íslensk verðtryggð heimili 51 milljarð á síðustu 12 mánuðum,“ segir hann og bætir við að þetta sé ótækt.
„Já, á meðan samræmda vísitala neysluverðs sýnir að hjá ESB ríkjum sé 12 mánaða verðbólga 9,6% þá er hún 5,4% hér á landi þegar hún er mæld eins. Hvernig geta stjórnmálamenn og stjórnvöld látið þetta viðgangast gagnvart leigjendum og íslenskum heimilum. Ástæðan er einföld að mínu mati stjórnvöld ganga erinda fjármálaaflanna og víla ekki fyrir sér að fórna leigjendum og skuldsettum heimilum á blóðugu altari verðtryggingarinnar!“
