„Þessi góði maður ætlar að gefa borgarsjóði 300 milljónir gegn því að útsvarsgreiðendur í Reykjavík leggi til 10.000 milljónir á móti allra þeirra góðu verkefna sem hann leggur til.“
Þetta segir Vigdís Hauksdóttir, borgarfulltrúi Miðflokksins, í færslu á Facebook-síðu sinni. Vigdís gerir þar fjörugan fund borgarstjórnar í gær að umtalsefni en á honum var meðal annars rætt um stuðning Bloomberg Philantrophies um að styðja við og hraða stafrænni umbreytingu á þjónustu borgarinnar.
„Þetta er Michael R. Bloomberg, sem ég nefndi í kvöld á fundi borgarstjórnar "aðstoðarborgarstjóra" Reykjavíkur. Borgarstjóri gat ekki upplýst á fundinum á hvaða lagagrunni móttaka þessa fjármagns byggir samk. íslenskum lögum. Hann gat ekki svarað því - en hann hafði þetta um málið að segja: "Það sem ekki er bannað er leyfilegt" Ja-há!!!,“ segir Vigdís.
Bloomberg Philanthropies verður bakhjarl borgarinnar í stafrænni vegferð hennar og fær borgarsjóður 300 milljónir króna. Vigdís lagði fram tillögu um að taka ekki við peningunum fyrr en lagagrundvöllurinn væri skýr, en það er skemmst frá því að segja að tillagan var fellt af meirihlutanum og fulltrúa Sósíalista. Í bókun sinni sagði Vigdís:
„Heiður og æra“ er orsök þess að Reykjavíkurborg er að taka við 300 milljóna styrk að sögn borgarstjóra og formanns mannréttinda- og lýðræðisráðs. Lög skipta ekki máli hjá borgarstjóra og hann getur ekki svarað fyrirspurn frá 12. ágúst sl. á hvaða lögum þessi gjafagjörningur byggir.
Hér er verið að snúa sönnunarbirgði við að krefja mig um svör á hvaða lögum málið er byggt en ekki öfugt.
Tekjustofnar sveitarfélaga á Íslandi eru skýrt afmarkaðir í sveitarstjórnarlögum. Þeir eru skattar á íbúa og fyrirtækja, greiðslur úr jöfnunarsjóði og þjónustutekjur. Ekki er um aðra tekjustofna að ræða nema ef um arð dótturfélaga er að ræða. Jafnræði og gegnsæi er lykilatriði í allri stjórnsýslu og rekstri sveitarfélaga. Íslensk sveitarstjórnarlög eru í fullu samræmi að þessu leyti við sveitarstjórnarlög í öðrum norrænum ríkjum.
Nú þegar hef ég sent Samgöngu- og sveitarstjórnarráðuneytinu erindi til að skorið verði úr um hvort það samræmist stjórnarskrá Íslands, sveitarstjórnarlögum nr. 138/2011 og stjórnsýslulögum nr. 37/1993 að höfuðborg Íslands taki á móti gjafafé frá erlendum einkaaðila sem hefur heimilsfesti í Bandaríkjunum af fyrrgreindri stærðargráðu sem skal renna beint inn í rekstur borgarinnar.“
