„Blessuð sé minning hans,“ segir Vigdís Hauksdóttir, borgarfulltrúi Miðflokksins. Vigdís minnist föður síns, Hauks Gíslasonar, sem hefði orðið hundrað ára í dag hefði hann lifað. Haukur fæddist þann 23. desember árið 1920.
Vigdís segir að ekki sé laust við það að það sé svolítið skrýtið að eiga föður sem hefði orðið hundrað ára í dag hefði hann lifað. Faðir hennar lést þann 26. júlí árið 2002 en Vigdís kom í heiminn þegar hann var á 45. aldursári.
Í færslu á Facebook birtir hún greinarstúf um föður sinn sem finna má í nýútkominni Flóamannabók:
„Haukur var félagslega sinnaður eins og hann átti ætt til og tók og tók meðal annars virkan þátt í starfi Framsóknarflokksins. Formaður skólanefndar sveitarinnar og var virkur í Tafl- og briddsfélagi hreppsins. Hann var kosinn í hreppsnefnd 1966 og sat þar til 1982. Lengi umboðsmaður skattstjóra og gerði skattaskýrslur fyrir sveitunga sína.
Tók við sem hreppstjóri af föður sínum 1961 og var til 1992. Hann var einn af stofnendum Sauðfjárræktarfélags Hraungerðishrepps og gjaldkeri þess í áratugi. Sauðféð var hans eftirlæti, hann var fremstur í röð ræktunarmanna, átti margt fé og marga verðlaunahrúta. Haukur var hlýr maður með góða kímnigáfu, glöggur og umtalsgóður um fólk. Hafði gaman að taka af að taka í spil og oft var líf í tuskunum þegar þeir bræður tóku nokkrar rúbertur í briddsinu við fjórða mann.“
