Vigdís Hauksdóttir, borgarfulltrúi Miðflokksins, segir að hugur hennar sé hjá Degi og fjölskyldu hans.
Eins og greint var frá í gær var skotið úr byssu á bíl Dags um liðna helgi. Bifreiðin var að öllum líkindum mannlaus þegar atvikið varð og sennilega við heimili borgarstjóra. Eðli málsins samkvæmt lítur lögregla málið mjög alvarlegum augum.
Vigdís hefur um langa hríð verið einn harðasti andstæðingur Dags B. Eggertssonar og hafa sumir látið að því liggja að Vigdís beri einhverja ábyrgð á atviki liðinnar helgar. Líf Magneudóttir, borgarfulltrúi VG, ýjaði til dæmis að því á Twitter í gær og vísaði til myndbands þar sem heimili Dags sést. Vigdís les inn á myndbandið sem hún segir að hafi verið unnið fyrir samtökin Björgum Laugaveginum.
Vigdís hefur um langa hríð verið einn harðasti gagnrýnandi Dags. Í fyrrasumar lét hún allskonar ófögur orð fjalla um borgarstjóra í pistli sem vakti nokkra athygli.
En Vigdís vill ekki sjá það að stjórnmálamenn verði fyrir ofbeldi eða ógnunum af einhverju tagi.
„Við sem samfélag getum aldrei liðið ofbeldi og skemmdarverk. Ég hef margoft tekið upp öryggismál borgarfulltrúa á forsætisnefndarfundum og hefur aldrei neitt verið gert með það. Að minni beiðni eru öryggismálin loks á dagskrá forsætisnefndar kl. 10:30 í dag. Snúum bökum saman hvar í flokki sem við stöndum og komum í veg fyrir ofbeldi,“ segir hún á Facebook-síðu sinni.
