Vigdís Hauksdóttir, borgarfulltrúi Miðflokksins, er óhress með auglýsingu Ljósmæðrafélags Íslands sem meðal annars má sjá á einum af strætisvögnum borgarinnar.
Umræddur strætisvagn er skreyttur teikningum sem sýna konur í fæðingu og við hlið þeirra má sjá orðin: „Við tökum vel á móti þér!“
Vagninn hefur nú ekið um götur borgarinnar í um það bil viku og vakið eftirtekt. Alþjóðadagur ljósmæðra var þann 5. maí síðastliðinn og þann dag opnaði einmitt sýning með sama nafni, Við tökum vel á móti þér, í Þjóðarbókhlöðunni.
Vigdís er hins vegar allt annað en sátt við teikningarnar og spyr hvort þeir hjá strætó sé „að missa vitið“. Svo virðist sem Vigdísi þyki myndirnar fara yfir strikið.
„Hverju á að ná fram með svona auglýsingum? Nekt er mjög viðkvæm hjá mörgum hópum í samfélaginu - og þetta blasir við börnum sem nota Strætó sem eiga að vera framtíðar kúnnar borgarlínu. Er þetta keypt auglýsing eða að frumkvæði Strætó?,“ spyr Vigdís á Facebook-síðu sinni.
Ljósmæðrafélag Íslands keypti þessa skemmtilegu auglýsingu á rafvagn hjá okkur. Ljósmæðravagninn byrjar á leið 18 í dag og fer sína fyrstu ferð kl. 17:04 frá Spöng. pic.twitter.com/poxTHVmkDU
— Strætó (@straetobs) June 24, 2020
