Viðvörunarbjöllur Víðis Reynissonar, yfirlögregluþjóns almannavarna, eru farnar af stað og kveikt á þeim vegna fjölgunar kórónuveirusmita. Þetta segir Víðir í samtali við fréttastofu Stöðvar 2, Vísis og Bylgjunnarsem birtist í dag.
„Við höfum alltaf áhyggjur þegar tölurnar stökkva upp og það kveikir alltaf á viðvörunarbjöllum,“ segir Víðir í samtali við fréttastofuna. Tíu smit greindust í dag en níu voru í sóttkví og segir hann það í það minnsta jákvætt.
Víðir segist hafa mestar áhyggjur af því að sá fjöldi landamærasmita sem greinist nú, fari brátt að greinast innanlands líka.
„Það er það sem við höfum mestar áhyggjur af núna og sóttvarnalæknir hefur sent heilbrigðisráðherra minnisblað þar sem hann reifar hugmyndir sínar um hvernig er hægt að herða tökin á landamærunum,“ segir Víðir.
„Við sjáum neyðarástandið í löndunum í kring um okkur. Í Bretlandi, Danmörku og víða í Evrópu er nánast algjört neyðarástand í gangi. Við viljum auðvitað verja okkur eins og hægt er og vonandi fá þessar tillögur sóttvarnalæknis umræðu,“ segir Víðir. Hann segir það sjást hvað samstaðan skipti miklu máli á Íslandi.
„Við sjáum bara hversu miklu samstaðan hjá íslensku þjóðinni hefur skilað í baráttunni en á sama tíma sjáum við aðrar þjóðir þar sem það hefur ekki náðst. Við sjáum það hjá fólki sem kemur frá þeim löndum að það kannski telur að það geti hegðað sér á Íslandi eins og það hegðaði sér heima hjá sér. Við erum að reyna að útskýra fyrir fólki að við erum komin með aðra menningu í þessu hér,“ segir Víðir.
