„Fyrir nokkrum árum töpuðum við vinur minn 4,2 milljónum á tuttugu dögum,“ segir Víðir Snær Björnsson í samtali við Lokum.is.
Víðir er 43 ára málari og er frásögn hans hluti af árverkniherferð SÁS, samtaka áhugafólks um spilafíkn, sem hefur það markmið að varpa ljósi á hversu skaðleg fíkn í spilakassa getur orðið.
Víðir þekkir spilafíkn betur en margir enda hefur hann tapað stórum fjárhæðum í kössunum. Hann hefur ekki spilað í þrjá mánuði þar sem kassarnir hafa verið lokaðir og kveðst hann vona að þeir opni ekki aftur. „Plís ekki opna þessa kassa aftur,“ segir hann í viðtalinu.
Mest hefur Víðir tapað tæplega einni milljón króna á einum degi, en algengast er að hann tapi á bilinu 50 til 100 þúsund krónur. Víðir hefur einnig reynslu af því að lifa með áfengis- og vímuefnafíkn en segir í viðtalinu að spilafíknin sé sú öflugasta.
„Þegar mér líður eins og eitthvað vanti í lífið þá fer ég fyrst í spilakassann til að stoppa hausinn. Þar loka ég út heiminn. Deyfi mig og gleymi öllu. Ég fer frekar í kassann en til sálfræðings eða læknis. Það er skrýtið hvernig þetta virkar,“ segir hann.
Stærsti vinningurinn sem Víðir hefur unnið í spilakassa voru 1.370 þúsund krónur.
„Mamma geymdi fyrir mig hálfa milljón. Það kvöld tapaði ég 450 þúsund krónum og afgangurinn fór á tveimur dögum. Það fylgja því engar tilfinningar að vinna. Mér er alveg sama þó ég vinni. Það er best að vinna ekki því þá get ég ekki haldið áfram að spila,“ segir hann.
Hann og vinur hans töpuðu einu sinni rúmum fjórum milljónum króna á 20 dögum eins og hann bendir á hér að framan.
„Við sátum hlið við hlið í spilasal og spiluðum og spiluðum. Við vorum fyrstir inn í kassana og seinastir út. Enginn sagði neitt. Enginn pikkaði í okkur og sagði að nú væri nóg komið. Við vorum farnir að þekkja starfsmenn á báðum vöktum. Töpuðum 50 til 100 þúsund krónum á klukkustundarfresti. Enginn sagði neitt. Plís ekki opna þessa kassa aftur.“
Hér má lesa alla sögu Víðis og kynna sér átakið betur.
