Víðir Reynisson, yfirlögregluþjónn hjá almannavörnum, er kominn í vikufrí. Þetta staðfestir Rögnvaldur Ólafsson, aðalvarðstjóri hjá almannavörnum, við mbl.is. Rögnvaldur leysir Víði af á upplýsingafundi almannavarna í dag og næsta fimmtudag.
„Hann er mjög vel að þessu fríi kominn; hann er búinn að vera vinna í þessu frá byrjun nánast og ekki fengið nema stöku helgarfrí. Þetta er held ég lengsta samfellda frí sem hann fær í næstum því hálft ár held ég,“ segir Rögnvaldur við mbl.is.
„Þó að menn séu vel stemmdir og reynslumiklir í þessu þá tekur svona löng törn á,“ segir hann.
Þórólfur Guðnason sóttvarnalæknir, Páll Þórhallsson verkefnastjóri í forsætisráðuneytinu, verða á fundinum í dag ásamt Rögnvaldi. Einnig verður þar Óskar Reykdalsson, forstjóri Heilsugæslu höfuðborgarsvæðisins.
