Rögnvaldur Ólafsson, aðstoðaryfirlögregluþjónn hjá almannavarnadeild ríkislögreglustjóra, segir að Víðir Reynisson sé allur að koma til. Víðir hefur eins og landsmenn væntanlega vita flestir glímt við COVID-19 að undanförnu.
Í gær var greint frá því að Víðir hefði verið kallaður inn á COVID-göngudeild Landspítalans þar sem líðan hans hafði farið versnandi. Hann fékk að fara heim að loknum rannsóknum.
Rögnvaldur segir í samtali við DV.is að Víðir sé betri í dag en hann var í gær en dagamunur sé á honum eins og þekkt er þegar COVID-19 er annars vegar. Segir hann að Víðir hafi fengið vökva í æð og hann hafi orðið hressari við það.
„Víðir ber sig vel og ekkert að barma sér,“ segir hann.
Eins og greint var frá í morgun greindust 14 smit hér á landi í gær og var mikill meirihluti þeirra í sóttkví, eða 12 einstaklingar. Rögnvaldur segir að þetta séu jákvæðar tölur þó ekki sé gott að sjá hversu margir eru í einangrun vegna veirunnar.
