„Þegar aðrir hópar í svipaðri stöðu fengu þó einhvern sértækan jólabónus í skóinn til að halda gleðilega hátíð – þá fengu eldri borgarar kartöflu í skóinn,“ segir Viðar Eggertsson, leikstjóri og verðandi eldri borgari, í aðsendri grein í Fréttablaðinu í dag.
Í grein sinni lýsir Viðar yfir óánægju sinni með ríkisstjórnina og segir hana raunar hafa fallið á prófinu gagnvart eldri borgurum á aðventunni á lokametrum fjárlagafrumvarpsins.
„Fjárlagafrumvarpið fyrir árið 2021 varð að lögum án nokkurra sértækra aðgerða fyrir eldri borgara sem þurfa margir hverjir að búa við verulega skertar tekjur og lifa undir fátæktarmörkum, eða um 6.000 manns,“ segir hann.
Hann segir að talsmenn félaga eldri borgara um allt land og Landssamband eldri borgara hafi hent út líflínu til ríkisstjórnarinnar á elleftu stundu þegar hefðbundin smánarleg árleg hækkun var staðreynd í frumvarpi til fjárlaga, hækkun um 3,6%.
„Líflínan var byggð á einfaldri og skiljanlegri setningu: „Alþingismenn, hækkið ellilífeyri um 15.750 kr. eins og aðrir fá.“ Launahækkun sem kveðið er á um í hinum víðfræga Lífskjarasamningi sem ríkisstjórnin, Samtök atvinnulífsins og verkalýðshreyfingin gerðu sátt um. Þessi krónutala mun leggjast á öll laun í landinu, há sem lág – nema eftirlaun eldra fólks.“
Viðar vísar í lög um almannatryggingar en í 69. grein laganna er kveðið á um að taka mið af launaþróun við ákvörðun um upphæðir almannatrygginga.
„Ellilífeyririnn þarf því að hækka um þessa sömu krónutölu og aðrir fá ef fullnægja á 69. greininni. Hann myndi þá fara úr 256.789 kr. á mánuði í 272.539 kr. sem gerir hækkun um 6,1% í stað þeirra 3,6% sem gert er ráð fyrir í fjárlagafrumvarpinu og yrði þá í takt við launaþróunina almennt í landinu.“
Hann segir að þessi einfalda og hógværa krafa talsmanna eldri borgara hefði getað bjargað andliti ríkisstjórnarinnar en hún skellt skollaeyrum við.
„Jafnvel þegar stjórnarandstaðan bar upp þessa réttmætu kröfu eldri borgara í umræðu um fjárlagafrumvarpið á þinginu, stráfelldi ríkisstjórnin hana – bara sisona til að staðfesta að fullu sinn einarða vilja og sýndi þar með sitt rétta andlit. Bak við þessa hunsun ríkisstjórnarinnar má lesa í undarlegum fullyrðingum og reiknikúnstum fjármálaráðherra, sem virðist ekki vera neitt sérstaklega talnaglöggur.“
Viðar segir að Bjarni Benediktsson fjármálaráðherra hafi blygðunarlaust haldið því fram á þessu kjörtímabili að ellilífeyrir sé 300 þúsund krónur, þó staðreyndin sé sú að hann er 256.789 kr.
„Enn minni árið áður. Og enn minni árið þar áður. Fjármálaráðherra hefur aldrei fengist til að skýra út þessa reiknivillu sína sem hann hefur þó haldið hátt á lofti hvað eftir annað. Né hefur hann upplýst að það er aðeins örlítill hluti eftirlaunafólk sem fær þessa upphæð óskerta. Í desember 2020 eru það 2.284 einstaklingar, samkvæmt upplýsingum frá Tryggingastofnun ríkisins.“
Viðar bendir á að eldri borgarar landsins séu yfir 45 þúsund talsins og stærstur hluti þeirra fái eftirlaun frá almannatryggingum skert meira og minna. Bendir hann á að allar tölur í umræddum pistli séu fyrir skatta og skerðingar.
„Fjármálaráðherra ástundar samt að fullyrða hvar sem hann kemur því við, að sjaldan hafi verið gert meira fyrir eldri borgara en með veru hans í ráðuneytinu, þó allir sjái að ráðherrann er jafn háðulega nakinn í réttri meðferð talna og keisarinn í ævintýrinu. Þessi stóri hópur, sem eldri borgarar eru, fékk kaldar kveðjur frá ríkisstjórninni á aðventunni. Ekki aðeins í fjárlagafrumvarpinu. Þegar aðrir hópar í svipaðri stöðu fengu þó einhvern sértækan jólabónus í skóinn til að halda gleðilega hátíð – þá fengu eldri borgarar kartöflu í skóinn.“
