Viðar hissa þegar konan sagði: „Það er á­kaf­lega hentugt að vera alkó­hól­isti þessa dagana“

„Kona ein sem ég lít mjög mikið upp til sagði mér í ný­liðinni viku: „Veistu Viðar, það er á­kaf­lega hentugt að vera alkó­hól­isti þessa dagana.“ Ég leyni því ekki að ég var nokkuð hissa á orðum hennar og spurði hana hvað hún ætti ná­kvæm­lega við. „Jú sjáðu til, í þessu á­standi neyðist maður hrein­lega til þess að taka einn dag í einu.“

Svona hefst hug­vekja séra Viðars Stefáns­sonar, prests í Landa­kirkju í Vest­manna­eyjum, en hug­vekjan er birt á vefnum Eyjar.net.

Eins og greint hefur verið frá hafa 26 til­felli CO­VID-19 verið greind í Vest­manna­eyjum. Þá hafa í­búar fengið þau fyrir­mæli að halda sig í litlum hópum og eru sam­komur þar sem eru tíu eða fleiri nú bannaðar. Viðar skrifar meðal annars um stöðu mála í Vest­manna­eyjum í hug­vekju sinni.

Viðar segir að full­yrðing konunnar sem ræddi við hann á dögunum sé tragíkómísk, þrátt fyrir að í þeim sé nokkurn vís­dóm að finna sem öllum ætti að vera kunnug­legur: „Að taka einn dag í einu. Þann vís­dóm er einnig að finna hjá frelsaranum: „Hafið því ekki á­hyggjur af morgun­deginum. Morgun­dagurinn mun hafa sínar á­hyggjur. Hverjum degi nægir sín þjáning.“

Viðar bendir einnig á að á­kveðinn húmor sé að finna í orðum konunnar – húmor sé eitt þeirra tækja sem við notum hvers­dags­lega og í amstri dagsins, meðal annars til að eiga auð­veldara með að glíma við erfiðar að­stæður. „Stundum er það jafn­vel svo að sann­leikurinn finnur sér far­veg í gegnum húmor.“

Viðar segir að ó­þarfi sé að fjöl­yrða um þá stað­reynd að nú skrýtnir dagar í Vest­manna­eyjum. „Og þeir verða enn skrýtnari eftir að settar voru reglur um strangara sam­komu­bann í gær. Í raun er ó­þarfi að tíunda það sem hefur skeð undan­farna daga því nægar eru frétta­veiturnar. Sýkin hefur gert vart við sig hér í sam­fé­lagi okkar og dá­góður hluti sam­fé­lagsins er í sótt­kví, sjálf­skipaðri eða form­legri. Við finnum öll að taktur sam­fé­lagsins slær hægar og ýmsu hefur verið slegið á frest, t.d. fermingum vorsins, og jafn­vel af­lýst með öllu.“

Viðar bendir einnig á að kvíði og ótti séu fylgi­fiskar ó­vissu­tíma. Það sé auð­velt að kvíða stóru verk­efni, sér­stak­lega þegar ekki sér fyrir endann á því. Verk­efnið er í þessu sam­hengi er CO­VID-19 far­aldurinn. Þá segir Viðar að eðli­legt sé að óttast þegar ó­ljóst er hvað fram­tíðin ber í skauti sér. „Í slíkum að­stæðum verður maður hrein­lega að taka einn dag í einu.“

Viðar segist bera þá von og trú í brjósti að Vest­mann­eyingar muni sigra þennan vá­gest sem veiran er. „Það er mikil­vægara núna en nokkru sinni fyrr að hlúa að hverju öðru. Við verðum jafn­framt að hlusta á á­hyggjur og kvíða annarra og virða. Tökum einn dag í einu því við getum varla annað eins og er.“

Hér má lesa hugvekjuna í heild sinni.