„Það að borgarfulltrúar meirihlutans skuli bera svo lítið skynbragð á fjármál að þeir staldri ekki einu sinni við þegar allt fer ítrekað úr böndum er verulegt áhyggjuefni fyrir skattgreiðendur í Reykjavík.“
Þetta kemur fram í leiðara Morgunblaðsins í dag sem eins og venjan er, er birtur nafnlaus en ætla má að þar haldi ritstjórinn Davíð Oddsson á penna. Þar eru tekin tvö dæmi um leikskóla á vegum borgarinnar þar sem keyrt hefur verið framúr áætlun vegna kostnaðar.
Sjá einnig: Dagur ver kaupin á Adam & Evu: „Morgunblaðinu tekst að hafa tvær fyrirsagnir rangar“ – Eyþór svarar
Nefnir Davíð kostnaðaráætlun vegna leikskóla að Safamýri 5. Segir Davíð að gert hafi verið ráð fyrir að það myndi kosta 420 milljónir og efri vikmörk um hálfur milljarður.
„Í liðinni viku var málið tekið fyrir aftur í borgarráði og þá var kynnt ný kostnaðaráætlun, kostnaðaráætlun II, og þá hafði hún hækkað í 752 milljónir króna, en óvissan eftir sem áður sögð 15%. Þetta þýðir að hækkun frá fyrstu kostnaðaráætlun, þeirri sem ákvörðun um að ráðast í verkefnið byggðist í raun á, er 79%, sem þýðir með öðrum orðum að sú kostnaðaráætlun var algerlega ónothæf.“
Meirihlutinn engan bilbug á sér finna
Davíð segir meiirihlutann ekki láta neinn bilbug á sér finna. „Enda kominn í slíkar ógöngur með leikskólarými eftir langvarandi vanrækslu að hann telur sig eflaust ekki geta hætt við þó að áætlanir reynist haldlausar og kostnaður fari úr böndum.“
Þá snýr Davíð sér næst að húsnæðinu sem áður hýsti Adam og Evu á Kleppsvegi. Kostnaðaráætlun upp á 623 milljónir hafi verið gerð en nú hljóði hún upp á 989 milljónir.
„Þessi tvö dæmi um sóun við byggingu leikskóla hjá borginni eru því miður ekki einstök. Og það þarf ekki að koma á óvart þó að bragginn alræmdi hafi skotið upp kollinum í þessari umræðu. Hér er um það að ræða að í tveimur fyrirhuguðum leikskólum er kostnaðaráætlun þegar komin nær 700 milljónum fram úr þeim áætlunum sem borgin byggði ákvörðun sína á. Þetta er gríðarmikið fé, ekki síst fyrir borg sem komin er í algerar ógöngur með fjármál sín.“
