Ian Mcdonald, verkamaður hjá Össuri og félagsmaður Eflingar, telur að yfirvofandi verkbann Samtaka atvinnulífsins muni hafa öfugverkandi áhrif. Atkvæðagreiðslu um verkbannið lýkur á morgun klukkan 16.
„Mín persónulega skoðun á því er að hugmyndin um verkbann er geðveiki. Ég veit að verkbönn hafa verið notuð í fortíðinni en aldrei af þeirri stærðargráðu sem nú er lagt til, að senda tuttugu þúsund fólk heim til sín launalaust,“ segir hann. „Þegar talað er um að senda svo mikið af vinnufólki heim til sín þá er í raun verið að tala um að setja íslenska efnahaginn á hliðina,“ segir Ian í samtali við Fréttablaðið.
Ian telur að áhrifin gætu orðið sérstaklega skæð þar sem félagsmenn Eflingar eiga í hlut.
„Við erum að tala um fólk sem vinnur á sjúkrahúsum, strætóbílstjóra, þrifnaðarstarfsfólk og svo framvegis. Þetta eru grundvallarstörf sem verða óunnin.“
Ian hefur búið á Íslandi í rúmlega sjö ár og hefur verið virkur í starfi Eflingar í um átján mánuði. Hann segir andrúmsloftið meðal samstarfsfólks síns hjá Össurri einkennast frekar af pirringi en reiði.
„Fólk skilur vel hvað er að gerast en það er þó augljóslega pirringur því að fólk vill fá launahækkun sem það hefur ekki fengið,“ segir hann. „Frá því að þetta ferli hófst þá höfum við hjá Eflingu verið að reyna að berjast fyrir fólki sem lifir bókstaflega frá launaseðli til launseðils. Fólk er alltaf á dansa á línunni um það hvort það geti lifað af eða ekki. Með því að hóta verkbanni þá er verið að ógna þessum launaseðli. Fólk er skiljanlega skelkað og það er mikið um spurningar.“
Hægt er að lesa viðtal Fréttablaðsins við Ian hér.
