Það gæti tekið þjóðarbúið allt að tíu ár að vinna upp framleiðslutapið vegna kórónuveirufaraldursins sem leikið hefur efnahag landsins grátt undanfarna mánuði. Markaðurinn í Fréttablaðinu fjallar um þetta í dag og vísar í sviðsmyndagreiningu Samtaka atvinnulífsins og Viðskiptaráðs Íslands.
Þar kemur fram að landsframleiðsla Íslands gæti dregist saman um 13 prósent á þessu ári. Ef sú spá rætist og hagvöxtur verður undir meðallagi næstu ár gæti tekið sjö ár að vinna upp framleiðslutapið. Svartasta spáin gerir ráð fyrir 10 árum en það er miðað við 2 prósenta árlegan hagvöxt.
Spáin er háð ýmsum breytum, til dæmis fjölda ferðamanna til landsins á næstu misserum. Bjartsýnasta spáin gerir ráð fyrir 65% fækkun ferðamanna en fækkun þeirra, ásamt öðrum þáttum, leiða til þess að samdráttur landsframleiðslu verði 8 prósent, eða 222 milljarðar króna. Þá verði samdráttur einkaneyslu 4 prósent og samdráttur fjárfestinga 14 prósent.
Svartsýnasta spáin gerir ráð fyrir að nær engir ferðamenn komi til landsins og samdráttur landsframleiðslu verði 18 prósent, eða 530 milljarðar króna. Fjárfesting muni dragast saman um 34 prósent, einkaneysla um 15 prósent og atvinnuleysi fara upp í 13 prósent.
„Meginniðurstaðan er sú að við erum að sigla inn í mjög djúpa kreppu sem gæti fært landsframleiðslu á mann átta ár aftur í tímann, miðað við grunnsviðsmynd,“ segir Konráð S. Guðjónsson, aðalhagfræðingur Viðskiptaráðs Íslands í Markaðnum í dag.
