Vara stúlkur á Rey Cup við því að fara á ball með drengjum úr öðrum menningar­heimum: „Stúlka á­reitt af er­lendum leik­mönnum árið 2017“

Þjálfarar 4. flokks kvenna í Breiða­blik hafa sent frá sér bréf til for­eldra stúlkna í flokknum þar sem mælst er til þess að leik­menn á yngra ári í flokknum fari ekki á ball og í sund­lauga­partý sem haldið er í tengslum við al­þjóð­lega knatt­spyrnu­mótið ReyCup sem hefst í Reykja­vík á morgun.

Þetta kemur fram í frétt Frétta­blaðsins sem hefur bréfið undir höndum.

Þjálfararnir segja mis­munandi aldurs­stig þátt­tak­enda, sitt­hvora menningar­heima sem og sögu­sagnir frá fyrri við­burðum standa að baki af­stöðu þeirra, en stjórn­endur Rey Cup segja í svörum til Frétta­blaðsins að allt sé unnið eftir bókinni við skipu­lagninguna. Stelpurnar sem um ræðir eru í 8. bekk og því 13 til 14 ára gamlar.

„Það hefur verið myndast ein­hver um­ræða undan­farið með ball og sund­laugar­partý á Rey Cup og af­stöðu okkar þjálfara á að leik­menn á yngra ári í 4.flokki fari ekki á þá við­burði,“ segir í bréfi frá þjálfurum Breiða­bliks til for­eldra stúlkna í 4. flokki hjá fé­laginu sem Frétta­blaðið hefur undir höndum.

Þjálfararnir vildu með bréfinu koma á fram­færi af­stöðu sinni sem þeir segja að feli samt sem áður ekki í sér að leik­mönnum sé bannað að fara á ballið eða í sund­laugar­partýið.

„Að sama skapi er okkar af­staða gagn­vart þessum tveimur skemmtunum sú að stelpur á yngra ári í 4.flokki hafa ekki erindi á. Það er því al­gjör­lega á á­byrgð for­eldra hvort þeir á­kveði að senda barnið sitt á þessa við­burði eða ekki. Venjan er sú að 3.flokkur kvenna Breiða­bliks hefur verið að fara á Rey Cup og því teljum við þær ekki vera að missa af ein­hverju þegar þeim býðst að fara þegar þær eru komnar í 3.flokk.“

Sú skoðun þjálfara Breiða­bliks að stelpur á yngra ári í 4. flokki, stelpur í 8. bekk í grunn­skóla fari ekki á um­ræddar skemmtanir, byggist á nokkrum þáttum, að því er fram kemur í bréfinu til for­eldra stúlknanna:

„Þarna eru saman komin krakkar á mjög mis­munandi aldurs­stigum (okkar stelpur á yngsta aldurs­stiginu) og frá sitt­hvorum menningar­heimum. Rey Cup setur þetta upp eins og grunn­skóla­ball sem er haldið fyrir börn í 8-10 bekk en þegar þú ert með leik­menn sem koma frá mörgum mis­munandi menningar­heimum þá finnst okkur ekki hægt að bera þessa tvo hluti saman.“

Þá rifja þjálfararnir upp at­vik í tengslum við svipaðar skemmtanir á árum áður í bréfinu:

„Árið 2017 þá kom upp at­vik þar sem stúlka á yngra ári í 4.flokki kvenna var á­reitt af tveimur er­lendum leik­mönnum í sund­lauga­partýinu. Annað at­vik átti sér stað á ballinu þetta sama ár þar sem eldri dómari var í “kapps­leik” við eins margar stelpur og hann gat.“

Þjálfarar Breiða­bliks segjast treysta sínum stelpum 100% þegar kemur að því að haga sér. „En það eru að­stæðurnar, aldurs­munur og þessir ó­líku skoðanir og menningar­heimar á hópnum sem við höfum á­hyggjur af.“

Hægt er að lesa svar Rey Cup til for­eldra og bréfið í heild sinni í frétt Frétta­blaðsins hér.