Tónlistarkonan Hildir Kristín Stefánsdóttir var hótað lífláti á meðan hún tók þátt í Söngvakeppni Sjónvarpsins árið 2017.
„Já, ég fékk líflátshótun. Ég held að þessi manneskja hafi verið mikill aðdáandi annars keppanda. Ég var með „missed call“ frá þessu sama númeri og svo skilaboð sem innihéldu þessa líflátshótun. Þetta var áður en ég steig á svið og keppti, áður en ég söng í keppninni.“
Hildur opnaði sig um málið í þættinum Á rúntinum. Hún segir að sér hafi ekki staðið á sama, hún hafi hugsað hvað hún væri búin að koma sér út í. Mikilvægt sé að brynja sig fyrir slíku en þó séu dagar þar sem svona lagað nái í gegn.
„Allir eru mannlegir. Ég man eftir einum degi þegar ég var orðin þreytt og lítil í mér og ég fékk ömurlegt skilaboð á Snapchat og mig langaði bar að hætta, ég nennti þessu ekki. Svo aðra daga, þegar ég var á góðum stað, þá var hugsaði ég bara, hvað er að þessu fólki?“ segir hún.
„Þetta minnir mann á að sama hversu sterkt fólk er þá getur alltaf komið sú stund þar sem þú ert lítill í þér, þreyttur eða eitthvað annað sem veldur því að þú tekur þessi illa.“
