Rúmlega fertugur karlmaður hélt að einhver væri að gera grín í honum þegar starfsmaður Íslenskrar getspár hringdi í hann á mánudag og tjáði honum að hann væri 35,4 milljónum króna ríkari.
Maðurinn var í vinnunni þegar símtalið kom og er óhætt að segja að það gleymist seint. Maðurinn hafði keypt sér miða í gegn lottóappið sem tryggði honum milljónirnar 35.
Í tilkynningu frá getspá kemur fram að maðurinn hafi sagt tilfinninguna algjörlega ólýsanlega. „Fyrsta verk verður að greiða niður skuldir, setja útborgun í íbúð og svo verð ég að gera eitthvað virkilega fallegt fyrir mömmu og pabba og líka dóttur mína“ sagði vinningshafinn.
Alls voru rúmar 70,9 milljónir í pottinum síðasta laugardag en tveir heppnir miðaeigendur voru með allar tölurnar réttar. Hinn miðinn var seldur hjá Kvikk, Suðurfelli 4 í Reykjavík en sá vinningshafi hefur enn ekki gefið sig fram.
Íslensk getspá hvetur því alla sem keyptu sér miða þar að fara vel yfir þá.
