Leik- og söngkonan Unnur Eggertsdóttir er í áhugaverðu viðtali í nýjasta þætti Einkalífsins á Vísi. Þar varpar Unnur meðal annars ljósi á nokkuð mörg áföll sem hún hefur upplifað á undanförnum árum.
Fyrir þremur árum var hún á leið frá Las Vegas til Los Angeles, þar sem hún er búsett, með vinkonu sinni þegar alvarlegt umferðarslys varð fyrir framan þær. Stór bíll hafði þá snúist á veginum og endað á hvolfi.
„Við vorum þær fyrstu á vettvang og hlaupa að fólkinu sem var inni í bílnum. Ég næ einhvern veginn að troða hausnum á mér inn um gluggann til að sjá þau,“ segir Unnur í viðtalinu en konan sem var að keyra bílinn var svo alvarlega slösuð að Unnur gat séð í henni heilann.
Maðurinn hennar var einnig alvarlega slasaður og missti reglulega meðvitund.
„Maðurinn bað mig um að hringja í börnin sín til að segja þeim hvað hafði gerst. Þarna er vegurinn alveg stíflaður og það tók slökkviliðsbílana og sjúkrabílana mjög langan tíma til að komast þangað. Ég sat með þessum manni í hálftíma eða klukkutíma á meðan konan er einhvern veginn að blæða út yfir hann,“ segir Unnur meðal annars.
„Að sjá manneskju svona ofboðslega slasaða og upplifa það með manni sem er að eiga versta dag lífs hans hafði mjög slæm áhrif á mig.“
Konan lést í slysinu og hefur Unnur verið í samskiptum við fjölskyldu hennar eftir slysið. Þannig var henni boðið að mæta í jarðarförina hennar.
Unnur nefnir fleiri áföll í viðtalinu, til dæmis flugslys sem hún lenti í árið 2009 og þegar bifreið var ekið á kærastann hennar árið 2019.
Hér má sjá viðtalið við Unni í heild sinni.
