Formaður borgarráðs, Einar Þorsteinsson, liggur undir ámæli eftir ummæli á Fréttavaktinni á Hringbraut í fyrradag. Þetta kemur fram í frétt Fréttablaðsins.
Einar sagði, eftir að hópur borgara hafði afhent 4.000 undirskriftir til að mótmæla röskun á starfi Vinjar vegna niðurskurðar hjá borginni:
„Ég velti því upp, þetta byrjaði sem sjálfboðaliðaverkefni af hálfu Rauða krossins, starfsemin í húsinu er þess eðlis að það þarf ekki endilega fagfólk til þess að sinna því. Ég velti fyrir mér hvort einhverjir af þessum 4.000 sem skrifuðu undir þetta eða Rauði krossinn eða aðrir sem vilja sinna þessum hópi með þessum hætti vilji gera það áfram.“
Í júlí 2022 var tilkynnt á vef Reykjavíkurborgar að borgin hefði tekið við rekstri Vinjar af Rauða krossinum eftir 29 ára sögu.
Sigþrúður Erla Arnardóttir, framkvæmdastjóri þjónustumiðstöðvarinnar, sagði þegar borgin tók við rekstrinum að spennandi tímar væru fram undan.
„Við ætlum að læra af því starfi sem hefur verið hér og tökum svo eitt skref í einu í átt að því að efla það enn frekar,“ sagði hún.
Rúmu ári síðar er Reykjavíkurborg á undanhaldi og fullkomin óvissa nú um framhaldið, notendum til ama.
„Mér finnst ótrúlegt að maðurinn skuli láta svona út úr sér. Hann kastar ábyrgðinni frá sér,“ segir Sanna Magdalena Mörtudóttir, borgarfulltrúi Sósíalista. Hún telur ummæli Einars til marks um vanþekkingu þeirra sem hafi völdin um framtíð Vinjar.
Margrét Eiríksdóttir, geðhjúkrunarfræðingur sem starfar hjá Landspítalanum, þekkir mjög vel til starfsins í Vin.
„Ummæli Einars eru óheppileg og vísbending um að hann áttar sig ekki á mikilvægi félagsmiðstöðvarinnar, áttar sig ekki á mikilvægi þess að hafa þjálfað fólk til að starfa með þessum hópi,“ segir Margrét.
Hún segir Rauða krossinn hafa stofnað Vin fyrir fólk með geðræn veikindi af því að engin slík þjónusta var fyrir hendi. Starfsreglur Rauða krossins séu að eiga ekki í samkeppni við önnur úrræði og þess vegna sé langsótt að Rauði krossinn taki aftur við starfinu.
„Svo þróaðist samfélagið og Rauði krossinn steig úr úr starfinu. Það var til að eiga ekki í samkeppni við önnur úrræði,“ segir Margrét.
Hún segir að það hafi þurft að hjálpa starfsmönnum sveitarfélaga að skilja að gestirnir stýri í raun starfinu. Í því ljósi sé varhugavert að halda að sjálfboðaliðar geti leitt starf hópsins í Vin á kostnað fagfólks.
„Við erum að tala um þjálfun frekar en menntun,“ segir Margrét. „Það er allt annað að koma í heimsókn á sunnudegi í Vin þegar bara eru sjálfboðaliðar eða virka daga þegar starfsmannahópurinn er á staðnum,“ segir Margrét.
