Eyþór Arnalds, oddviti Sjálfstæðisflokksins í borgarstjórn, gefur lítið fyrir áform meirihlutans um að lækka hámarkshraða á mörgum af helstu samgönguæðum borgarinnar.
Samkvæmt nýsamþykktri áætlun borgarinnar verður hámarkshraði á götum í eigu borgarinnar hvergi yfir fimmtíu kílómetrum á klukkustund. Eyþór var fyrir svörum í beinni útendingu hjá Stöð 2 í kvöld.
Sjá einnig: Hámarkshraði lækkar: Götur þrengdar og rúmlega 400 „30 km hlið“ sett up
„Við höfum áhyggjur af því að þegar það er verið að lækka umferðarhraða á lykilakreinum, eins og við Suðurlandsbrautina, Bústaðaveg, Grensásveg og víðar, þá sé tvennt sem geti gerst.
Annars vegar að afkastageta kerfisins minnkar og svo hitt að öryggisþátturinn gangi ekki upp, því að umferðin getur hreinlega leitað frekar inn í íbúðabyggð og nálægt skólum þegar fólk lendir í umferðarteppu á þessum lykilumferðarsvæðum,“ sagði Eyþór.
Hann segir að forsvarsmenn strætó telji einnig að þetta muni tefja almenningssamgöngur. Þessa í stað segist Eyþór vilja bæta umferðaröryggi.
„Sérstaklega nálægt íbúðabyggð, bæta gangbrautir eins og snjallbrautir sem við höfum lagt til, og lagt áherslu á að snjallvæða borgina. Við viljum lækka hraða þar sem hætta er, til dæmis nálægt skólum og annað, en ekki að fara í að þrengja að umferðinni á helstu æðunum.“
