„Áhuginn var mun meiri en við bjuggumst við. Ég er ekki með alveg nákvæma tölu á umsóknum núna en mér finnst líklegt að þær séu núna um 2.000 talsins.“
Þetta segir Eva Brá Önnudóttir, einn af eigendum hjálpartækjaverslunarinnar Losti.is, í samtali við vef Fréttablaðsins.
Fyrirtækið auglýsti eftir kynlífstækjaprófara um miðjan aprílmánuð og hefur áhuginn ekki látið á sér standa. Um tvö þúsund Íslendingar eru sagðir hafa sótt um starfið og eru þeir á öllum aldri – þeir yngstu eru 18 ára og sá elsti kominn vel yfir sextugt.
Eva segist telja að áhuginn sé til marks um það að kynlíf og kynhegðun fólks sé ekki jafn mikið „tabú“ og áður. „Það er ekki jafn mikil feimni í kringum þetta og áður, sem við erum ótrúlega ánægðar að sjá. Ég er ekkert viss um að svona margir hefðu sýnt þessu svona áhuga fyrir nokkrum árum,“ segir hún.
Nánar er fjallað um málið á vef Fréttablaðsins.
