Tveir einstaklingar létust um helgina vegna Covid-19 hér á landi um helgina. Már Kristjánsson, yfirlæknir smitsjúkdómadeildar Landspítalans, segir þetta í samtali við Fréttablaðið og bætir við að fólk sé að veikjast mjög hastarlega af veirunni, jafnvel einstaklingar sem eru bólusettir.
Veiran hefur sótt í sig veðrið að undanförnu eins og greint var frá fyrir helgi og sagði Þórólfur Guðnason sóttvarnalæknir að um 150 til 200 manns væru að greinast með smit á degi hverjum. Þá virðist eitthvað vera um alvarleg veikindi en fyrir helgi lágu þrír á gjörgæsludeild.
Már segir í Fréttablaðinu að alls séu nú 34 sjúklingar inniliggjandi með Covid á legudeildum og bráðamóttöku, dreifðir um níu starfsstöðvar Landspítala.
Þórólfur sagðist fyrir helgi ekki hafa trú á því að takmarkanir yrðu hertar á nýjum leik. Undir það tekur Már og segir: „Það held ég sé nú óskaplega lítil stemning fyrir því.“
