Tvær ungar íslenskar konur duttu svo sannarlega í lukkupottinn þegar tölurnar þeirra voru dregnar út síðasta laugardag í Lottó, en þá var potturinn fjórfaldur.
Þær munu skipta á milli sín 52 milljónum. Þetta kemur fram í tilkynningu frá Íslenskri getspá. Konurnar eiga það sameiginlegt að vera með tölurnar sínar í áskrift og voru báðar í sumarleyfi með fjölskyldum sínum þegar draumasímtalið kom, önnur á Íslandi en hin á Spáni.
Sú sem er í fríi á Íslandi segist í samtali við Íslenska getspá, vera stödd á fallegasta stað landsins í frábæru veðri, en hún var alein á göngu þegar hún fékk símtal um að hennar biðu 26 milljónir og hafði hún mestar áhyggjur af því að gleðiópin heyrðust í nálægar tjaldbúðir og ætlaði að taka á rás til að segja fjölskyldunni sinni gleðitíðindin.
Ekki voru fagnaðarlætin minni hjá fjölskyldunni sem var stödd á Spáni, enda ekki amalegt að fá fréttir um 26 milljóna króna vinning þegar verið er að njóta lífins á sólarströnd.
