Tryggvi Helgason, barnalæknir og sérfræðingur í offitu barna, segir að skilgreina þurfi offitu sem sjúkdóm og setja opinbera stefnu um hvernig eigi að taka á henni.
Tryggvi er í viðtali í nýjasta tölublaði Læknablaðsins þar sem þetta kemur meðal annars fram.
Ísland trónir á toppnum hvað varðar offitu meðal ríkja OECD og segir Tryggvi að það komi honum ekki sérstaklega á óvart.
„Hjá lýðheilsusviði Embættis landlæknis er ekki talað um offitu sem sérstætt vandamál heldur er unnið með ákveðna áhættuþætti eða undirþætti offitunnar. Það er einföldun á vandanum. Ég tel að það sé ekki næg áhersla á að það geti verið vandamál að hafa safnað of miklum orkubirgðum á líkamann,“ segir hann meðal annars í viðtalinu.
Hvetur hann landlækni til að skilgreina offitu sem sjúkdóm svo fólk eigi rétt á að fá hjálp til að takast á við aukakílóin og um leið minnka líkur á fylgisjúkdómum offitu. Í viðtalinu kemur fram að Tryggvi hafi raunar þegar sent bréf til lýðheilsusviðs Embættis landlæknis þar sem hann viðrar meðal annars áhyggjur sínar af fjölgun barna hér á landi sem glíma við offitu, en um 6,5% barna hér á landi eru of feit.
Hann bendir á að heilbrigðisráðherra hafi árið 2006 samþykkt yfirlýsingu Evrópudeildar Alþjóðaheilbrigðismálastofnunarinnar þess efnis að vinna gegn faraldri offitu. Nú þegar fimmtán ár eru liðin síðan áskorunin var undirrituð hafi lítið gerst og vandinn raunar vaxið.
Hann gagnrýnir það að þeir sem glíma við offitu hafi í raun ekki mörg úrræði. Boðið sé upp á sérhæfðar meðferðir á Reykjalundi og þá sé ársbiðlisti í Heilsuskólann, en það er úrræði Barnaspítalans þar sem hann starfar sem sérfræðingur.
„Ef 6,5% barna mælast með offitu eru það ríflega 3000 börn á landinu. Þau eiga kannski ekki öll að koma til okkar en þau þurfa aðstoð og geta ekki sótt hana. Eitt er að fækka þeim sem verða of þungir. Hitt að hjálpa þeim sem eru komnir í offitu og vilja breyta stöðu sinni.“
Viðtalið við Tryggva í heild sinni.
