Trúnaðarmenn Eflingar segja fullyrðingar Sólveigar Önnu Jónsdóttur, formanns Eflingar, um að samkomulag hafði náðst um framkvæmd uppsagnar vera með öllu ranga, „sem hún hefði vitað hefði hún setið fundina.“
Þetta kemur fram í yfirlýsingu frá Trúnaðarmönnum sem Fréttablaðið greinir frá.
Þar segir meðal annars að í ljósi þess að Sólveig Anna hafi rofið trúnað um bókun sem átti sér stað við lok samráðsferli sem trúnaðarmenn Eflingar áttu með lögmanni hennar gætu þau ekki séð að þau væru bundin trúnaði lengur.
Í bókun um lok samráðsferlis kemur fram að trúnaðarmenn hafi lýst yfir andstöðu við hópuppsögnina og talið ekkert því til fyrirstöðu að ná yfirlýstum markmiðum stjórnar Eflingar með öðrum hætti.
Þá segir einnig: „Þar sem ekki tókst að ná samkomulagi um aðra leið fallast trúnaðarmenn á að gera samkomulag að hluta, þ.e. um framkvæmd á uppsagnarfresti.“
Í yfirlýsingu trúnaðarmanna Eflingar segir að þau telji ekkert af yfirlýstum markmiðum stjórnar Eflingar krefjist hópuppsagnar.
„Við gáfum til kynna að við tækjum allar tillögur alvarlega og reyndum að vera samstarfsfús til lausna. Ekkert varð úr því. Við getum ekki sagt að um samráð hafi verið um að ræða í skilningi laga um hópuppsagnir, engin vilji var til breytinga eða mildunar á hópuppsögn heldur einhliða ákvörðun sem er röng, óskynsamleg og með öllu ónauðsynleg.
Gefnar voru upp ástæður sem fólust í breytingum á ráðningarkjörum og til að uppfylla skilyrði varðandi jafnaunavottun. Þessar ástæður eru ekki byggðar á rökum og halda engu vatni,“ segir jafnframt í yfirlýsingu þeirra.
Þá segir einnig að þegar ljóst væri að ekki væri hægt að koma í veg fyrir eða milda aðgerðir hafi samtal hafist um það hvernig standa mætti að þeim og til varð bókun sem vitnað er í hér að ofan.
Trúnaðarmennirnir segja að eftir á að hyggja hefðu þau viljað að hverjum og einum starfsmanni yrði afhend uppsögnin af hendi formannsins.
