Tómas Tómasson, þingmaður Flokks fólksins, best þekktur sem Tommi á Búllunni, segir það ósanngjarnt að fólk verði látið hætta að vinna 70 ára. Tommi ræddi þetta undir liðnum störf þingsins á Alþingi í dag:
„Þannig er að þegar menn, og konur, verða 70 ára og vinna hjá hinu opinbera eru þeir skikkaðir til að hætta að vinna. Ég er aftur á móti á undanþágu, orðinn 73 ára næstum, og er búinn að gera fjögurra ára samning við hið opinbera um að vera hér í fullri vinnu á ofurlaunum að auki,“ sagði hann.
„Ég fór í gær að hitta frænda minn, hann er læknir, hann er 73 ára, og um daginn fór ég að hitta gamlan skólabróður sem er tannlæknir, hann er 72 ára, og þeir voru báðir við góða heilsu. En ég fékk í gær tölvupóst frá konu sem var búin að vinna í 16 ár hjá hinu opinbera við umönnun, hún varð sjötug fyrir nokkrum mánuðum og þá var henni nánast hent út úr sinni vinnu. Þetta er ósanngjarnt. Ég segi því miður.“
Konan spurði hann hvers vegna í ósköpunum þetta væri ekki leiðrétt. Vitnaði hún í Bill Wyman, fyrrum bassaleikara Rolling Stonesm sem sagði eitt sinn í viðtali: „The fifties are the new thirties“ eða „sextugssaldurinn er hinn nýi fertugsaldur“.
Tommi sagði þetta ósanngjarnt:
„Ég vil meina að við sem erum á þessum aldri og erum með góða heilsu eigum að fá að vinna. Það er ósanngjarnt að reka fólk heim þegar það getur unnið.“
