„Í guðanna bænum, ef það er ekki orðið of seint, dragið í land með þessa fáranlegu Borgarlínu,“ segir Tómas A. Tómasson, veitingamaður oft kenndur við Búlluna, í pistli á vef Eiríks Jónssonar.
Tómas, sem hyggur á framboð fyrir Flokk fólksins fyrir þingkosningarnar í haust, bendir í pistli sínum á að hann sé oft á ferðinni á háannatíma, milli 15:30 og 17:30.
„Og þvílík umferð. Það eru bókstaflega tugir þúsunda bíla í umferðinni. Fólk að fara heim úr vinnunni eða skólanum eða eitthvað t.d. úr Laugum eins og ég. Ég hugsa með mér, er þetta fólkið sem ætlar að hætta að nota bílinn og fara í strætó? Í öllum veðrum með innkaupa poka, börn eða hina ýmsu hluti sem fylgja því.“
Tómas hefur búið víða, Los Angeles og Miami til dæmis, auk þess að hafa dvalið lengi í New York. Hann segir að í New York hvarfli ekki annað að honum en að nota neðanjarðarlestina en í Los Angeles og Miami hvarfli ekki að honum að nota almenningssamgöngur.
Hann nefnir að hann hafi nokkrum sinnum komið til Kúbu, sem er nánast jafnstór að flatarmáli en Ísland en með margfalt fleiri íbúa. Þar sé nóg pláss út um allt og ekki verið að þétta byggð.
„Ég kom til Taívan (fyrrum Formósu) fyrir nokkrum árum. Taívan er 33.000 ferkílómetrar og þar búa um 23 milljónir. Þar er líka nóg pláss. Við erum rúmlega 360 þúsund og hér er verið að þétta byggð í erg og gríð.“
Tómas spyr hvers vegna í ósköpunum sé verið að þétta byggð þegar draumur flestra fjölskyldna er að eiga sitt eigið hús með bílskúr og garði. „Hvar eiga börnin að leika sér í þéttri byggð. Við erum ekki í Hong Kong eða London eða annarri stórborg, við erum í Reykjavík, dásamlegu Reykjavík á yndislega Íslandi með nóg pláss.“
Pistil Tómasar má lesa í heild sinni hér.
