„Það er verið að byggja endalausar blokkir út um allt sem eru margar svo þétt saman að eina útsýnið er næsta blokk,“ segir Tómas A. Tómasson veitingamaður, betur þekktur sem Tommi á Búllunni, í pistli á vef Eiríks Jónssonar.
Þar gerir Tommi skipulagsmál í borginni meðal annars að umtalsefni. Hann gerir það á nokkuð skemmtilegan hátt með því að vísa í Óskarsverðlaunakvikmyndina Bridge on the River Kwai frá árinu 1957.
Myndin segir frá því þegar Japanir hertóku breska hermenn og skelltu í fangabúðir í Búrma. Áttu fangarnir að byggja brú yfir Kway-fljótið. Einn af þessum föngum, sem leikinn var af Alec Guinness, neitaði að taka þátt í verkefninu þar sem hann taldi það brjóta gegn ákvæðum Genfar-sáttmálans.
„En þegar hann sér hvað Japanarnir eru slappir stjórnendur verksins þá stenst hann ekki máti og tekur að sér stjórn framkvæmda og klárar brúna. En áttar sig svo á því að hann var að vinna fyrir óvinina og þegar vígja á brúna og fyrsta lestin er að fara yfir þá sér hann að sér og segir þessa mögnuðu settningu “WHAT HAVE I DONE?” um leið og hann hnígur niður eftir að hafa verið skotinn í hita leiksins og dettur á rafmagnssprengjubox sem setur í gang sprengju sem búið var að koma fyrir undir brúnni og brúin springur.“
Tommi segir að honum verði iðulega hugsað til skipuleggjenda Reykjavíkurborgar sem hafa keppst við að þétta byggð, eins og plássið á Reykjavíkursvæðinu sé af skornum skammti.
„Það er verið að troða, sem dæmi, um 800 íbúðum bara á svokölluðum Hlíðarendareit. Og hjá Kirkjusandi er svipað. Maður gæti haldið að þetta væri Hong Kong eða Manhattan. Hvar eru raðhúsin, parhúsin, einbýlishúsin, hús með görðum fyrir heitan pott og grillaðstöðu, prívatsvæði með bílskúr ekki bara merkt pláss í bíla geymslu sem er í órafjarlægð frá vistarverum íbúanna.“
Tommi segir að skaðinn sé skeður og í raun lítið hægt að gera.
„Eina sem ég er að vona er að þeir sem eru ábyrgir muni á einhverjum tímapunkt vakna til lífsins, horfa yfir völlinn og borgina og segja “WHAT HAVE I DONE?”.“
